ԵՐԵՎԱՆ, 14 մայիսի — Sputnik. Ընտրելու իրավունք ունեցող 842 147 քաղաքացիներից Երևանի ավագանու ընտրություններին մասնակցել է 345 226 մարդ, ինչը կազմում է ընդհանուր թվի 40.99%-ը։ Այս մասին հայտնեց Կենտրոնական ընտրական հանձնաժողովի նախագահ Տիգրան Մուկուչյանը
Նախնական տվյալներով` ընտրողների մասնակցության ամենամեծ թիվը գրանցվել է Ավան վարչական շրջանում (52,75%), ամենափոքրը` Քանաքեռ-Զեյթուն վարչական շրջանում (33,23%)։
Այս պահին Երևանի 10 ընտրատարածքների 474 ընտրատեղամասերում ընթանում է քվեների հաշվարկը։
Երևանի ավագանու ընտրություններին մասնակցում է քաղաքական երեք ուժ` ՀՀԿ-ն, «Երկիր ծիրանի» կուսակցությունն ու «Ելք» դաշինքը։
Հայաստանի հանրապետական կուսակցության քաղաքապետի թեկնածուն գործող քաղաքապետ Տարոն Մարգարյանն է։ «Երկիր ծիրանի» կուսակցության թեկնածուն` Զարուհի Փոստանջյանը, իսկ «Ելք» դաշինքինը` Նիկոլ Փաշինյանը։
