ԵՐԵՎԱՆ, 14 մայիսի — Sputnik. Հայաստանի ԱԺ նախագահ Գալուստ Սահակյանը մասնակցեց Երևանի ավագանու ընտրությունների քվեարկությանը։
Սահակյանը իր քաղաքացիական պարտքը կատարեց կնոջ` Ժաննա Աղաբաբյանի հետ Պեյո Յավորովի անվան դպրոցում տեղակայված ընտրատեղամասում։
«Կարծում եմ, որ վերջին տարիներին քաղաքապետը լավ է աշխատել։ Երևանը նույնիսկ կոմունիզմի տարիներին այսպիսի տեսք չուներ։ Կարծում եմ` ոչ միայն Տարոն Մարգարյանը, այլ նաև նրա թիմը լավ է աշխատում», — ավելացրեց նա։
Պատասխանելով այն հարցին, թե արդյոք կհամաձայնի՞ կրկին գլխավորել ԱԺ-ն, խորհրդարանի խոսնակը փիլիսոփայական պատասխան տվեց։
«Այդ պաշտոնում պետք է փորձառու մարդ լինի։ Ամբողջ աշխարհում է այդպես։ Բնական է` «ուզում եմ, թե ոչ» հարցի պատասխանը կախված է քննարկման արդյունքներից», — ասաց նա։
Նա խորհուրդ տվեց սպասել ընտրությունների արդյունքին, որից հետո ամեն ինչ պարզ կդառնա։ ԱԺ խոսնակի քվեարկությունից հետո նույն ընտրատարածքում իր քաղաքացիական պարտքը կատարեց Սահակյանի որդին` Արման Սահակյանը։ Նա նշեց, որ քվեարկեց հանուն «բարեկեցիկ, հարմարավետ և անվտանգ Երևանի»։
