ԵՐԵՎԱՆ, 12 մայիսի — Sputnik. Երևանյան «Ոսկե ժանյակ» նորաձևության միջազգային փառատոնը (Yerevan Fashion Week "Golden Lace") նախօրեին մեկնարկեց լեգենդար Վյաչեսլավ Զայցևի մասնակցությամբ:
Միջոցառման բացմանը ներկայացվեցին Զայցևի, ինչպես նաև հայ մոդելավորողներ Լիանա Սարգսյանի ու Գևորգ Նուռ Շադոյանի հավաքածուները: Երևանում Նորաձևության շաբաթ անցկացնելու նախաձեռնության հեղինակ, Հայ ոսկերիչների համաշխարհային ասոցիացիայի (AJA) նախագահ Գագիկ Գևորգյանի խոսքով՝ Զայցևի հավաքածուի նմուշներն ընտրվել են հատուկ Հայաստանի ցուցադրության համար:
Հայ հանդիսատեսը ծափերով դիմավորեց բեմ բարձրացած Զայցևին: Նա էլ խոստովանեց, որ երջանիկ է Հայաստանում գտնվելու համար:
«Անչափ շնորհակալ եմ: Երջանիկ եմ, որ այսօր այստեղ եմ, ձեզ հետ»,- ասաց Զայցևն ու չկարողացավ զսպել հուզմունքը:
«Ուրախության արցունքներ են,- ասաց Գևորգյանն ու ավելացրեց,- առաջին անգամ եմ արցունքներ տեսնում Զայցևի աչքերում, և դա եղավ Հայաստանում»:
