ԵՐԵՎԱՆ, 13 մայիսի — Sputnik. Հայաստանը կարող է ուղղակիորեն ներգրավված լինել սիրիական զարգացումներում, Sputnik Արմենիա մամուլի կենտրոնում կայացած ասուլիսի ընթացքում ասաց արաբագետ Արմեն Պետրոսյանը՝ անդրադառնալով Հայաստանի պաշտպանության նախարարի հայտարարությանը։
Ավելի վաղ Հայաստանի պաշտպանության նախարար Վիգեն Սարգսյանը հայտարարել էր, որ քննարկվում է հայ սակրավորների մասնակցությունը Սիրիայում Ռուսաստանի կողմից անցկացվող ականազերծման աշխատանքներին:
«Այսօր Ռուսաստանը ձգտում է ընդլայնել իր դաշնակիցների շրջանակը Սիրիայում: Եթե մինչ այս գոնե հումանիտար օգնության ոլորտում Հայաստանը ակտիվ դեր էր կատարում, ապա չի բացառվում, որ այն անմիջական մասնակցություն ունենա Սիրիայի գործընթացներին», — ասաց Պետրոսյանը։
Արաբագետը չբացառեց, որ այդ ներգրավվածությունը կարող է կապված լինել դեէսկալացիոն գոտիներում իրականացվող աշխատանքների հետ՝ որպես օգնություն Ռուսաստանին և Սիրիայի եղբայրական ժողովրդին։
«Հնարավոր է՝ Հայաստանը որոշակի ներկայացվածություն ունենա, բնականաբար՝ սահմանափակ գործառույթներով՝ հաշվի առնելով երկրի հնարավորությունները։ Սակայն տվյալ պահին թիվ մեկ հարցը Ռուսաստանին քաղաքական աջակցություն ցուցաբերելն է», — նշեց Պետրասյանը։
Մայիսի սկզբին Հայաստանի արտգործնախարար Էդվարդ Նալբանդյանը հայտնել էր, որ երկիրը մտադիր է Սիրիա ուղարկել մարդասիրական օգնության հերթական (երրորդ) խմբաքանակը։
