ԵՐԵՎԱՆ, 11 մայիսի — Sputnik. Կարևոր չէ, թե ի ծնե ինչ հատկանիշներ ունես, կարևոր է, որ աշխատես դրանց զարգացման վրա ու համառորեն աշխատես։ Այս մասին հայտարարել է Հենրիխ Մխիթարյանը «Մանչեսթեր Յունայթեդի» պաշտոնական կայքին տված հարցազրույցում։
«Տաղանդը աջակից կլինի, բայց եթե չաշխատես, ոչինչ չի ստացվի: ԱՊԼ-ում ես զարգացրել եմ արագությունը և ֆիզիկական ուժը, խաղադաշտում ուրիշ ֆուտբոլիստ եմ դարձել: Փորձում եմ լինել գազան, հրեշ: Ես պայքարում եմ յուրաքանչյուր գնդակի համար: Բայց խաղադաշտից դուրս ես հանգիստ եմ, ոչ մի ագրեսիա չկա»,- Մխիթարյանի խոսքերն է մեջբերում ակումբի պաշտոնական կայքը:
«Մանչեսթեր Յունայթեդի» կիսապաշտպան Հենրիխ Մխիթարյանը պատմել է, թե ինչ ընդհանուր բաներ է տեսնում իր և իր հոր` «Արարատի» նախկին հարձակվող Համլետ Մխիթարյանի միջև:
«Ես շատ բան եմ ժառանգել հորիցս, բայց կարծում եմ` նա ավելի արագ էր: Նա ուժեղ հարվածի էր տիրապետում, ավելի լավ գոլային հոտառություն ուներ: Ինձ թվում է՝ ես տարբերվում եմ նրանից, և իմաստ չունի մեզ համեմատել»,- ասել է նա:
