ԵՐԵՎԱՆ, 11 մայիսի — Sputnik. Տավուշի մարզով անցնող Մ4 միջպետական ճանապարհի ասֆալտը քանդված է, ուստի վարորդները ֆինանսական տեսանկյունից լուրջ խնդիրներ են ունենում։ Տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը հայտնեց, որ խնդիրը միայն ճանապարհի որակին չի վերաբերում։
«Ավելի շատ միջպետական ճանապարհի կողքի շինությունների բետոնի արգելափակոցները հանելու խնդիրն էր։ Ճանապարհը վերանորոգվում է, ինչպես արդեն խոստացել եմ, 15-20 օրվա ընթացքում կավարտվեն փոսալցումները»,- ասաց նախարարը։
Նրա տեղեկացմամբ` Հաղարծինի մոտ ևս կատարվում են կապիտալ աշխատանքներ։ Հարցին, թե ինչու են այս աշխատանքները հայաստանյան պայմաններում այդքան հետաձգվում ու երկարատև դառնում, նախարարը պատասխանեց` մեջբերելով եղանակային պայմանները։
«Ամեն օր այստեղ եղանակային պայմաններն այնպիսին են, որ անձրևի և ցեխի պայմաններում հնարավոր չի լինում կապիտալ շինարարություն անցկացնել»,- ասաց նախարարը։
Նախարարն ամփոփեց`Հայաստանի ճանապարհները բարվոք վիճակի բերելու համար 500 միլիարդ դրամի ներդրումային ծրագիր է հարկավոր։
