ԵՐԵՎԱՆ, 11 մայիսի — Sputnik. Հավաքականի գլխավոր մարզիչ Հրաչյա Չանդիրյանը ՀԱՕԿ լրատվականին հայտնել է, որ մրցաշարին մասնակցելու են Ազատ և Վլադիմիր Հարությունյանները:
«Ազատը լիարժեք չի վերականգնվել վնասվածքից, սակայն դեռ մի քանի օր ունենք: Նա կմասնակցի միայն սինքրոն ցատկ մրցաձևում, որպեսզի շատ չծանրաբեռնվի և վնասվածքը չխորանա: Իսկ Վլադիմիրը հանդես կգա նաև անհատական ցատկում»,- ասել է մարզիչը:
Նրա խոսքով` եղբայրների մարզավիճակը կատարյալ չէ, բայց փորձելու են առավելագույնի հասնել:
«Մադրիդի «Գրան Պրին» մեզ համար կարևոր է որպես մրցափորձ, Եվրոպայի առաջնությունից առաջ: Արդյունքներին այնքան էլ ուշադրություն չեմ դարձնում: Դեռ չգիտեմ ուժեղագույն մարզիկներ մասնակցելո՞ւ են, թե` ոչ: Այդ պատճառով դժվարանում եմ ասել՝ արդյո՞ք մեդալի շանս կունենանք: Մեր գլխավոր նպատակը Եվրոպայի առաջնությունն է»,- ասել է Չանդիրյանը:
Ջրացատկի Եվրոպայի առաջնությունը կկայանա հունիսի 12-18-ը Կիևում: Հայաստանը կներկայացնի երեք մարզիկ, սակայն հավաքականի գլխավոր մարզիչը դեռևս չի որոշել թիմի կազմը:
