ԵՐԵՎԱՆ, 11 մայիսի — Sputnik, Լաուրա Սարգսյան. Երևանից Թել Ավիվ և հակառակ ուղղությամբ «Armenia» ավիաընկերության ինքնաթիռները կթռչեն շաբաթական երկու անգամ՝ աննախադեպ ցածր գներով։
«Ավիաընկերությունը չվերթեր է իրականացնելու հինգշաբթի և կիրակի օրերին։ Թռիչքի տևողությունը կկազմը 2.5 ժամ։ Թռիչքից 60 օր առաջ ձեռք բերված տոմսի արժեքը կկազմի 102 եվրո՝ մեկ ուղղությամբ»,- Sputnik Արմենիայի թղթակցի հետ զրույցում ասաց «Armenia» ավիաընկերության տնօրենի տեղակալ Գևորգ Խաչատրյանը։
Նրա խոսքով` դա հիանալի հնարավորություն է նրանց համար, ովքեր ծրագրել էին արձակուրդներն անցկացնել Իսրայելի բիբլիական վայրերում կամ այցելել աշխարհում քրիստոնեություն ընդունած առաջին երկիրը` Հայաստանը։ Թռիչքից 60 օր շուտ ձեռք բերված տոմսի արժեքը երկու ուղղությամբ կկազմի 205 եվրա։ Դրա մեջ մտնում է 20 կգ ուղեբեռ և 7 կգ ձեռքի բեռ։
Հայաստանից Իսրայել առաջին չվերթը նախատեսված է ապրիլի 21-ին, սակայն քաղաքական խնդիրների պատճառով, որոնք կապված չէին անմիջապես ավիաընկերության հետ և պետք է լուծվեին ավելի բարձր մակարդակով, «Armenia»-ն թույլտվություն չստացավ չվերթեր իրականացնելու համար։
Ամենօրյա քրտնաջան աշխատանքի արդյունքում ավիաընկերության և Քաղավիացիայի վարչության ներկայացուցիչներին հաջողվել է մեկ տարի անց թույլտվություն ստանալ դեպի Իսրայել կանոնավոր չվերթեր իրականացնելու համար։
«Այդ ուղղությունը մեծ պահանջարկ է վայելում։ Իսրայելը հետաքրքիր է հայերին ոչ միայն տեսարժան վայրերով, այլև մեծ հայկական համայնքով։ Իր հերթին, Հայաստանում իսրայելցիներին հետաքրքրում է էքստրեմալ զբոսաշրջությունը, որը մեր երկրում զարգանում է արագ տեմպերով»,- ասաց Խաչատրյանը։
Թել Ավիվ թռիչքների իրականացման թույլտվություն ավիաընկերությունը ստացել է ապրիլի 19-ին։ Տոմսերը վաճառքի են հանվել ապրիլի 20-ից։
«Armenia»-ն արդեն կանոնավոր չվերթեր է իրականացնում դեպի Բեյրութ, Մինվոդի, Վորոնեժ, ինչպես նաև չարտերային չվերթեր է իրականացնում տարբեր ուղղություններով։
«Armenia» ավիաընկերությունն ունի երկու ինքնաթիռ` Boeing 737-500 և Boeing 737-700։ Անձնակազմում կա 53 աշխատակից։ Ավիաընկերության հիմնադիրներն են Աշոտ Թորոսյանը (51 տոկոս բաժնետոմս), Թամազ Գաիաշվիլին (24 տոկոս) և Ռոբերտ Օգանեսյանը (25 տոկոս):
