ԵՐԵՎԱՆ, 11 մայիսի – Sputnik. ՀՀԿ-ի կողմից հուշագիրը ստորագրեց ՀՀԿ փոխնախագահ Արմեն Աշոտյանը, իսկ ՀՅԴ-ի կողմից՝ կուսակցության ԳՄ ներկայացուցիչ Աղվան Վարդանյանը:
Հուշագրի ստորագրումից հետո նրանք հանդես եկան ճեպազրուցով, որի ընթացքում հայտարարվեց` վարչապետի թեկնածությունն առաջադրվելու է ՀՀԿ–ի կողմից։ Աշոտյանի խոսքով` սա սպառիչ պատասխան է այն հարցին, թե ինչ է լինելու 2018 թվականից հետո։
Արդեն 4-րդ անգամ է, ինչ ՀՅԴ-ն իշխանության հետ կոալիցիոն կառավարման հուշագիր է ստորագրում։
Առաջին անգամ ՀՅԴ-ն կոալիցիոն հուշագիր է ստորագրել Ռոբերտ Քոչարյանի ղեկավարման տարիներին` 2003 թվականին, այնուհետև` Սերժ Սարգսյանի օրոք, հուշագիր է ստորագրվել 2007 և 2016 թվականներին։
Վերջին երկու կոալիցիոն համաձայնագրերը երկար կյանք չունեցան։ Այս պահին քաղաքական շրջանակներում քննարկումներ են ընթանում, թե ինչ ճակատագիր կունենա այսօր ստորագրվելիք հուշագիրը։
