Այս գիշեր Ադրբեջանը Թափկարակոյունլու-Թալիշ ուղղությամբ կատարել է զրահատեխնիկայի տեղաշարժ, իսկ նախօրեին արցախա-ադրբեջանական շփման գծի հյուսիսային հատվածում գնդակոծության է ենթարկվել «Շանթ» հեռուստաընկերության նկարահանող խումբը։ ԼՂՀ նախագահի մամուլի քարտուղար Դավիթ Բաբայանը Sputnik Արմենիայի եթերում խոսել է այս 2 իրադարձությունների մասին։
«Ադրբեջանական զրահատեխնիկայի տեղաշարժն առօրյա գործընթաց է, արտառոց որևէ բան չկա։ Ավելին` ես համարում եմ, որ այդ տեղեկությունը չպետք է դառնա աժիոտաժի հիմք։ 10 տանկ շարժվել է, հետո վերադարձել իր տեղը։ Սա բնական է»,- ասել է Բաբայանը։
Նա անդրադարձել է «Շանթ» հեռուստաընկերության նկարահանող խմբի ուղղությամբ կրակելու թեմային` շեշտելով, որ այդ մասին պետք է խոսել։
«Ադրբեջանական կողմը գիտեր, որ նրանք լրագրողներ են, տղաների մոտ տեսախցիկներ կային։ Ես տեսել եմ տղաներին, վիրավոր օպերատորին ։ Նրա կյանքին որևէ վտանգ չի սպառնում, և ընդհանրապես նրանք իրենց դրսևորել են որպես իսկական մարտիկներ։ Եվ վիրավորված վիճակում չեն թողել, որ իրենց անմիջապես հանեն կրակի միջից, որպեսզի սպառնալիքի տակ չդրվի զինծառայողների կյանքը։ Այս մասին պետք է խոսվի`դրանով ցույց տալով հակառակորդին, որ կապ չունի` ով ինչ մասնագիտության տեր է, բոլորս հայրենիքի պաշտպաններ ենք»,- ասել է Բաբայանը։
Նրա խոսքով` նման օրինակները մենք պետք է ցույց տանք հանրությանը և ոչ թե խոսենք տանկերի տեղաշարժի մասին։
