ԵՐԵՎԱՆ, 10 մայիսի — Sputnik, Լաուրա Սարգսյան. Հավանական է, որ Հայաստանում մոտ ապագայում միջազգային հայտնի նորաձև բրենդների հետ համագործակցող ձեռնարկություններ բացվեն։ Նմանատիպ օրինակ արդեն կա Վանաձորում։ Արտադրությունը «տոլինգի» սկզբունքով արդեն մի քանի տարի է աշխատում է սպորտային հագուստի հայտնի նորաձև իտալական բրենդներից մեկի հետ։ Այդ մասին Sputnik Արմենիայի թղթակցի հետ զրույցում ասաց լիբանանահայ գործարար Ռաֆֆի Սեմերջյանը։
«Մեզ իտալական որոշ բրենդեր են դիմել։ Մոտ ապագայում, հավանաբար, նմանատիպ մի ձեռնարկություն կբացենք, որը կհամագործակցի այլ իտալական բրենդի հետ։ Դա թույլ կտա նոր աշխատատեղեր ստեղծել», — ասաց Սեմերջյանը։
Հայաստանում մի շարք փորձագետներ այս նախաձեռնությունն, ընդհանուր առմամբ դրական են գնահատում, սակայն միևնույն ժամանակ հեռահար հեռանկարում այն գրավիչ չեն համարում։ «Տոլինգը» թույլ է տալիս միայն կարել և արտադրանքը պատվիրատուին հասցնել` իր իսկ տրամադրած հումքի հիման վրա։ Հետևաբար, դրանով զբաղվող ընկերությունն, ամբողջությամբ կախվածության մեջ է գտնվում պատվիրատուից։ Մյուսները կարծում են, թե «տոլինգը» լավ տրամպլին է ձեռնարկության համար։
Լիբանանահայ գործարարն ընդգծում է, որ Հայաստանում ներդրում կատարել ցանկանում են արաբական աշխարհից մի շարք մարդիկ։ Նրանք պատրաստ են գումարներ ներդնել գյուղատնտեսական և արդյունաբերական նախագծերի մեջ։ Դրա համար Հայաստանում բոլոր պայմանները կան` բերրի հող և լավ մասնագետներ։
«Հայաստանն ավելի գրավիչ դարձավ ներդրողների համար ԵԱՏՄ-ին անդամակցելուց հետո, ինչը հասանելի է դարձնում նրա համար 170-միլիոնանոց շուկան և համագործակցության բազում ուղիներ բացում», — ասաց Սեմերջյանը։
Գործարարը համոզված է, որ Հայաստանը, ճիշտ մոտեցում ցուցաբերելու պարագայում, ԵԱՏՄ շրջանակներում մի շարք խաչաձև նախագծերից կարող է ավելի մեծ շահույթ ստանալ։
Վերջին ժամանակները քննարկվում է նաև Հայաստանի միջոցով Իրանի հետ ԵԱՏՄ երկրների համագործակցության հարցը։ Ներկա պահին Հայաստանն ու Իրանն աշխատում են միասնական ազատ առևտրի գոտի ստեղծելու նախագծի վրա, որը գործելու է հայ-իրանական սահմանին։ Դա ոչ միայն կնպաստի երկու երկրների միջև ապրանքաշրջանառության ծավալների ավելացմանն, այլև թույլ կտա տարբեր ոլորտներում երկկողմ հարաբերություններ խորացնել։
Հայաստանի Սյունիքի մարզում Հայաստանի և Իրանի միջև ազատ առևտրի գոտու ստեղծումը մեր երկիրը կապող օղակ կդարձնի ԵԱՏՄ-ի և իրանական կողմի միջև։ Այդ «կամրջով» հետագայում կկարողանան օգտվել նաև եվրոպական բիզնեսի ներկայացուցիչները։ Ազատ առևտրի գոտու ստեղծման համար 32 մլն դոլար է անհրաժեշտ։
