ԵՐԵՎԱՆ, 8 ապրիլի — Sputnik. ՆՏՎ հեռուստաալիքի և Sputnik տեղեկատվական գործակալության և ռադիոկայանի համատեղ «Ты супер!» երաժշտական մրցույթում Հայաստանը ներկայացնող երկրորդ մասնակիցը` Սաբինա Մանվելյանը, Անգելինա Պապիկյանից հետո լքեց նախագիծը:
Սաբինան կատարեց Ռիհաննայի «We Found love» երգը, սակայն նրա կատարումը չբավարարեց ժյուրիի բոլոր անդամներին:
Սաբինային, իհարկե, թույլ չտվեցին բեմից հեռանալ առանց ջերմ խոսքերի և սիրո խոստովանության:
«Բեմում այնքան քիչ են զգացմունքային արտիստները: Սաբինոչկա, ուզում եմ ասել, որ սիրում ենք քեզ ոչ թե ինչ-որ բանի համար, այլ հենց այնպես: Մեր սերը քո ելույթի հետ կապ չունի», — ասաց Յոլկան: Իսկ Դրոբիշը Սաբինային երջանկություն մաղթեց, քանի որ միայն այդ դեպքում արտիստը կարող է երջանկության զգացողությունը փոխանցել ունկնդրին:
«Հուզվելը պետք է. բոլորն են հուզվում: Չեն հուզվում միայն հիմարները, իսկ ելույթից պետք է նախևառաջ հաճույք ստանաս: Եվ այդ ժամանակ դու կկարողանաս նաև մեզ փոխանցել այդ հաճույքը, և մենք այն կկիսենք քեզ հետ: Փորձի'ր ապագայում այնպես անել, որ դա քեզ երջանկություն պարգևի», — ասաց կոմպոզիտորն ու ավելացրեց, որ Սաբինային այդ հարցում կարող է օգնել միայն նրա ժպիտը:
Ժյուրիի անդամների խորհուրդներին հաջորդեցին սպասման երկար ու ձիգ րոպեները հատուկ սենյակում: Սաբինան վերջապես բեմ դուրս եկավ: Նրա փոխարեն ընտրեցին այլ մասնակիցների: Արցունքներ չհոսեցին. նա իր պարտությունը հպարտությամբ ընդունեց: Օլիմպիական մասնակցության սկզբունքը, որը երբեմն հաղթանակից էլ կարևոր է, տեսանք գործողության մեջ: Բայց դե երեխան երեխա է մնում, և արցունքները գետի պես հոսեցին ավելի ուշ` արդեն հետնաբեմում: Տեսախցիկն արձանագրեց: Բայց մենք կարող ենք ձևացնել, թե ոչինչ չտեսանք: Չտեսանք նաև, թե ինչպես Վիկտոր Դրոբիշը նրան ամուր գրկեց ու փորձեց հանգստացնել…
«Բարև, բարև, կարմիր արև». ջերմ հայերենով Սաբինային ողջունեց հաղորդավարը: Եվ թող այսօրվա օրը լինի նրա ամենամեծ հիասթափությունը, իսկ կարմիր արևը փայլի ոչ միայն նրան ողջ կյանքում, այլև նրա մեջ: Չէ՞ որ ինչպես ասաց Յոլկան, Սաբինային մենք սիրում ենք ոչ թե ինչ-որ բանի համար, այլ հենց այնպես:
Sputnik-ի ռեսուրսներում շարունակվում է «Ты супер!»-ի մասնակիցներին սատարելու առցանց քվեարկությունը, որի արդյունքում առավելագույն ձայներ ստացած մասնակիցներից 3-ը Sputnik ռադիոյի եթերում ելույթ ունենալու և մրցույթի մասնակցության մասին պատմելու հնարավորություն կստանան։
ՆՏՎ-ի «Ты супер!» նախագիծը ինքնադրսևորվելու հնարավորություն է տալիս ծնողական խնամքից զրկված տաղանդավոր երեխաներին։ Նախագծին մասնակցում են Ռուսաստանի և հետխորհրդային երկրների երեխաները։ Sputnik-ը պատանի տաղանդներ է գտել Աբխազիայում, Բելառուսում, Վրաստանում, Ղազախստանում, Ղրղըզստանում, Մոլդովայում, Էստոնիայում և Հարավային Օսեթիայում։
