Ինքնաբացարկի դիմումները նախապես գրելու սովորույթն, իհարկե, ինչպես ասում են վաղուց հայտնի տրյուկ է, սակայն բացահայտ դրանք չեղյալ համարելու պահանջ երբրևէ չէր ներկայացվել: Եթե հավատանք մանդատ պահանջողների խոսքերին, որ ոչ մի ինքնաբացարկի դիմում իրենք չեն ստորագրել, ապա ինչպես են այդ դիմումներն ի հայտ եկել: Իսկ եթե այդ մարդիկ իրոք նախապես ինքնաբացարկի դիմում են գրել, ապա ինչո՞ւ են գրել և հիմա ինչո՞ւ են հրաժարվում:
Արդյո՞ք «Ծառուկյան դաշինքում» հայտնված այդ 12 պատգամավորներն, իրոք տեղյակ չէին, թե նախապես ինչ թղթի տակ են ստորագրում, թե սա էլ մի խաղ էր: Ակնհյատ է, որ 12-ն էլ կազմակերպված են գնացել այդ քայլին, նախապես պլանավորված ու գիտակցված: Արդյո՞ք Ծառուկյանի համար էլ անակնկալ էր նրանց ինքնաբացարկի դիմումները, թե անակնկալն արեցին հենց այդ պատգամավորները և հենց Ծառուկյանին: Ակնհայտորեն այս պատգամավորները ցույց տվեցին, որ դեմ են գնում Ծառուկյանի որոշումներին: Այդ դեպքում ինչպես են շարունակելու դաշինքի շահերը ներկայացնել խորհրդարանում:
Միամտություն կլինի կարծել, որ ինքնաբացարկի դիմումները հայտնվել էին ԿԸՀ-ում առանց Ծառուկյանի իմացության: Եվ արդյո՞ք իրոք անակնկալ էր այդ պատգամավորների համար նման դիմումների առկայությունը: Ծառուկյանն ակնհայտորեն չէր ցանկանում, որ վերոհիշյալ պատգամավորները լինեն խորհրդարանում: Բայց պարզվում է, որ մեր քաղաքական իրականության մեջ դեռևս առկա է անհետացող այն տեսակը, որ պայքարում է իր իրավունքերի ու արդարության համար, այն էլ ոչ թե մեկը, այլ 12-ը: Եվ արդարության կռիվ տվողների այս քայլն ընդամենը ներսից հարված էր հենց դաշինքի ղեկավարին՝ նրան դարձնելով անկարող իր որոշումներում:
Թե իրականում ինչ խաղ էր սա, ցույց կտա ժամանակը, սակայն դեռևս չձևավորված խորհրդարանի մեկնարկն արդեն սկանդալային էր: «Ծառուկյան դաշինքը» խորհրդարան մտավ արդեն պառակտված, թեև մանդատ պահանջող պատգամավորները պնդում են, թե Ծառուկյանի հետ որևէ խնդիր չունեն: Շատերը հայտարարեցին, որ կատարվածը լուրջ սկանդալ է և պետք է հանձնել իրավապահների քննությանը, շատերն էլ փորձեցին մեկնաբանել, որ այստեղ ՀՀԿ-ի մատն է խառը:
Գուցե պղտոր ջրում ձուկ որսացողներ դեռ լինեն, սակայն նկատենք, որ այս խաղում հատկապես ակտիվ էր Նապոլեոն Ազիզյանը, հայտնի Նապ մականունով: Նա շարունակում է պնդել, որ Գագիկ Ծառուկյանի թիմում է գործելու: Մանդատ պահանջողների մեջ էր նաև նախկին ՀՀՇ-ական Արարատ Զուրաբանը, նաև մի շարք ոչինչ չասող անուններ: Այսպիսով` ծռուկյանականների համար ոչ այնքան հաճելի մեկնարկով Ազգային ժողովի անդրանիկ նիստը տեղի կունենա մայիսի 18-ին և մինչ ԱԺ նախագահ ընտրվելն այն կվարի պատգամավորներից ամենատարեցը:
Իսկ 6-րդ գումարման ԱԺ-ի ամենատարեց պատգամավորը հենց 71-ամյա Նապոլեոն Ազիզյանն է: Փաստորեն, նրան ոչ միայն մանդատից էին փորձում զրկել, այլև որոշակի ժամանակով Աժ «նախագահ» դառնալու հնարավորությունից։ Իսկ այդ հարցում նա ընդամենը մեկ տարի տարբերությամբ մրցակցում էր հանրապետական Արա Բաբլոյանի հետ:
Շարունակելով ինքնաբացարկների թեման՝ նկատենք, որ հանրապետականների ու դաշնակցականների դեպքում այդ հարցում անակնկալներ չեղան: Դիմում գրողները, ենթադրաբար, գործադիրում պաշտոն ստացողներն են:
Հանրապետականից Վիգեն Սարգսյանն ու Արմեն Ամիրյանը, հավանաբար, կվերանշանակվեն Պաշտպանության եւ Մշակույթի նախարարների պաշտոններում, իսկ Տարոն Մարգարյանը պայքարում է կրկին քաղաքապետ դառնալու համար: Գործադիրից կրկին օրենսդիր աշխատանքի կվերադառնա արդարադատության նախարար Արփինե Հովհաննիսյանը։
Այսպիսով, հայտնի է 6-րդ գումարման խորհրդարանի կազմը: Պատգամավորները ստացան մանդատները: Առաջին նիստի ընթացքում պարզ կդառնա նաև, թե ով կլինի ԱԺ նախագահը, ովքեր կլինեն տեղակալները և հանձնաժողովների նախագահները: Հենց այդ օրը կառավարությունը հրաժարական կտա և 10 օրվա ընթացքում նախագահը կնշանակի նոր վարչապետ: Իսկ քսանօրյա ժամկետում կնշանակվեն նախարարները:
