ԵՐԵՎԱՆ, 6 մայիսի — Sputnik. Շուշիի ազատագրումը բեկումնային դարձավ հայկական հողերի վերամիավորման համար մղվող պայքարում, Sputnik Արմենիա մամուլի կենտրոնում հրավիրված ասուլիսի ժամանակ ասաց ՀՀ ԶՈՒ և ՌԴ ԶՈՒ զորքերի (ուժերի) միացյալ խմբավորման հրամանատար, գեներալ-մայոր Անդրանիկ Մակարյանը:
«Հայաստանը պետք է սկսվի և ավարտվի մեր պատմական հայրենիքի սահմաններով: Ազատամարտիկներն այս գիտակցումով Հայաստանից մեկնեցին Ղարաբաղ», — ասաց Մակարյանը:
Նրա կարծիքով` մեզ բախտ վիճակվեց երկար դադարից հետո պատմական հաղթանակ տոնել և շարունակել մեր հայրենիքի վերամիավորման գործընթացի սուրբ գործը:
«Այդ սուրբ գործի հաղթանակի գագաթնակետը հանդիսացավ մեր պատմական Շուշիի ազատագրումը, որն իրականացվեց հայ հրամանատարի, հայ զինվորի, հայ ֆիդայու, հայ ազատամարտիկի և հայ ժողովրդի հավաքական ուժի շնորհիվ», — ընդգծտց Մակարյանը:
Մակարյանը Շուշիի ազատագրման ժամանակ Տավուշի մարզում հետ էր մղում ադրբեջանական կողմի հարձակումները, որոնց նպատակն էր հայկական ուժերի ուշադրությունը շեղել Շուշիից:
Շուշիի ազատագրման պլանը` հայտնի «Հարսանիք լեռներում» գործողությունը, գրեթե անթերի էր մշակման և իրականացման առումով։ Այն արմատական բեկում առաջացրեց Արցախյան ազատագրական պատերազմում:
Գործողությունն իրականացվել է 4 ուղղությամբ, այն ղեկավարել է Ինքնապաշտպանության ուժերի (ԻՊՈւ) հրամանատար Արկադի Տեր-Թադևոսյանը: Հրամանատարական կետերում էին գեներալ-մայոր Գուրգեն Դալիբալթայանը, Սերժ Սարգսյանը, Ռ. Գզողյանը, Զորի Բալայանը, կապը, բուժօգնությունը, հրետանային նախապատրաստությունը, ինժեներական ծառայությունը:
