ԵՐԵՎԱՆ, 6 մայիսի — Sputnik. Հայ ժողովուրդը կարևոր ավանդ է ներդրել Հայրենական մեծ պատերազմի հաղթանակի գործում, Sputnik Արմենիա մուլտիմեդիոն մամուլի կենտրոնում ասաց ՀՀ ԶՈՒ և ՌԴ ԶՈՒ զորքերի (ուժերի) միացյալ խմբավորման հրամանատար, գեներալ-մայոր Անդրանիկ Մակարյանը:
Նրա խոսքով` սակավաթիվ հայ ժողովուրդը, որի մի մասը փրկվեց Ցեղասպանության տարիներին, «որակյալ ներդրում» ունեցավ Հայրենական մեծ պատերազմի հաղթանակի գործում:
«Միայն Հայաստանից 300 հազար զինվոր և սպա մասնակցեց պատերազմին: Եվս 200 հազարը` նախկին ԽՍՀՄ այլ հանրապետություններից: Երկրորդ համաշխարհային պատերազմին 60 հազար հայ էլ մասնակցեց դաշնակիցների բանակի կազմում», — ասաց Մակարյանը:
Ավելի քան 66 հազար հայեր արժանացան «Արիության համար» մեդալի, 27-ն դարձան «Փառքի շքանշանի» ասպետ, 108-ը` Խորհրդային միության հերոսի կոչում ստացան (4-ը` Ֆիննական պատերազմում, 3-ը` Հայրենական մեծ պատերազմի ավարտից հետո):
Պատերազմի տարիներին հայ ժողովուրդը 64 գեներալ տվեց, մեկ ավիացիայի մարշալ և մեկ ծովակալ: 1955 թվականին մարշալի կոչում ստացավ Բաղրամյանը, ծովակալի կոչում շնորհվեց Իսակովին: 1975 թվականին զրահատանկային զորքերի մարշալի կոչմանն արժանացավ Բաբաջանյանը:
Մակարյանի խոսքով` հաշվի առնելով այն բոլոր բարձր պաշտոնները, որոնք զբաղեցնում էին հայերը, կարելի է ասել, որ նրանց հրամանատարության տակ կռվել է մոտավորապես մեկ միլիոն զինվոր:
