ԵՐԵՎԱՆ, 5 մայիսի — Sputnik. Մայիսի 4-ին ՀՀ բնապահպանության նախարարության բնապահպանական պետական տեսչության Լոռու տարածքային բաժնի տեսուչները գետի ափին արջի երկու քոթոթ են հայտնաբերել:
ՀՀ բնապահպանության նախարարության բնապահպանական պետական տեսչության պետը դիմել է «Վայրի բնության եւ մշակութային արժեքների պահպանման հիմնադրամի» տնօրինությանը՝ քոթոթներին փրկելու համար միջոցներ ձեռնարկելու առաջարկով: Այս մասին հայտնում է ՀՀ բնապահպանության նախարարության մամուլի ծառայությունը։
«Հիմնադրամն անմիջապես արձագանքել է և ՀՀ Լոռու մարզից քոթոթներին տեղափոխել Երևանի կենդանաբանական այգի, որի նորագույն սարքավորումներով զինված կենդանաբուժական կլինիկայում քոթոթները կանցնեն բուժզննում»,- նշված է հաղորդագրության մեջ։
Այնուհետև կենդանիները կտեղափոխվեն Վայրի կենդանիների փրկարար կենտրոնի՝ Կովկասյան կենսաբազմազանության ապաստարան:
