ԵՐԵՎԱՆ, 5 մայիսի — Sputnik. Հայաստանի տարածք ադրբեջանական խնձորի ներմուծման հանգամանքները պարզելու նպատակով խոշոր չափերով հարկ չվճարելու դեպքի առթիվ ՀՀ քրեական օրենսգրքի 205-րդ հոդվածի 1-ին մասով հարուցվել է քրեական գործ:
ՀՀ գլխավոր դատախազությունը տեղեկացնում է, որ քրեական գործի նախաքննության ընթացքում տվյալներ են ձեռք, որ մի խումբ ՀՀ քաղաքացիներ Վրաստանի տարածքից պետական սահմանով ապօրինի տեղափոխել են գյուղատնտեսական ապրանքներ, այդ թվում՝ ադրբեջանական խնձոր:
Միաժամանակ, ազգային անվտանգության ծառայության աշխատակիցների ձեռնարկած միջոցների արդյունքում պարզվել է, որ վերը նշված ապրանքները տեղափոխվել են առանց մաքսային հսկողության, կաշառքի դիմաց՝ մաքսային ծառայողների թողտվությամբ:
Նկատի ունենալով, որ նշված քրեական գործերն առնչվում են պետական հատուկ ծառայություն իրականացնող անձանց կողմից առերևույթ կատարված հանցագործություններին, ՀՀ քրեական դատավարության օրենսգրքի 190-րդ հոդվածով սահմանված կարգով, քրեական գործերի նախաքննությունը հանձնարարվել է ՀՀ հատուկ քննչական ծառայությանը:
Նախաքննություն իրականացնող մարմնին հանձնարարվել է ձեռնարկել օրենքով նախատեսված բոլոր միջոցները՝ առանց մաքսային հսկողության ՀՀ ներմուծումների դեպքերը, դրանց առնչվող մաքսային ծառայողների հանցավոր գործունեության բոլոր հանգամանքները լիարժեք բացահայտելու ուղղությամբ:
