ԵՐԵՎԱՆ, 4 մայիսի — Sputnik. Վրաստանի առողջապահության, աշխատանքի և սոցիալական հարցերի նախարարությունը հեպատիտ C վիրուսով հիվանդների բուժման համար նախատեսված հակավիրուսային «Սովալդի» դեղը որպես նվիրատվություն կտրամադրի ՀՀ առողջապահության նախարարությանը։ Այն որպես նվիրատվություն ընդունելու որոշման նախագիծը ներկայացրեց ՀՀ առողջապահության նախարար Լևոն Ալթունյանը։
«Նախագծի ընդունման արդյունքում ակնկալում ենք Հայաստանում ապահովել հեպատիտ C-ով հիվանդների բուժման արդյունավետությունը նոր սերնդի դեղով»,– ասաց նախարարը:
Առողջապահության նախարարությանն է տրամադրվելու 3000 տուփ դեղ, որը բավական է 1000 հիվանդի բուժելու համար։
Վարչապետ Կարեն Կարապետյանը Լևոն Ալթունյանի միջոցով շնորհակալական խոսքեր փոխանցեց Վրաստանի գործընկերներին։
Բանն այն է, որ կառավարության 17/17 որոշման մեջ ներառված է այն հիվանդությունների ցանկը, որոնց դեպքում ձեռքբերված դեղորայքը հիվանդներին տրվում է անվճար։ Հեպատիտ C-ն ներառված չէ նշյալ հիվանդությունների ցանկում։ Հետևաբար այս հիվանդությունն ունեցողները ստիպված են դեղերը ձեռք բերել սեփական միջոցներով։ Այս մասին Sputnik Արմենիայի հետ զրույցում պատմեց ՀՀ ԱՆ դեղորայքային քաղաքականության բաժնի պետ Անահիտ Մկրտչյանը։
