ԵՐԵՎԱՆ, 3 մայիսի — Sputnik, Խաչիկ Չախոյան. Քրիշտիանու Ռոնալդուն նոր ռեկորդներ սահմանեց այս մրցավեճում ՝դառնալով հետ-տրիկի հեղինակ: Նախ` պորտուգալացին Չեմպիոնների լիգայում իր խփած գնդակների թիվը հասցրեց 103-ի և բացի այդ էլ՝ դարձավ առաջին ֆուտբոլիստը, որը փլեյ օֆֆ-ում երկու անգամ դարձել է հետ-տրիկի հեղինակ:
Հաշվի առնելով այն հանգամանքը, որ «Ռեալը» խաղում էր սեփական հարկի տակ, շատերը ֆավորիտ էին համարում հենց Զինեդին Զիդանի թիմին: Բայց, որ «Ռեալը» նման առավելություն կունենա սկզբունքային մրցակցի նկատմամբ՝ դժվար էր կանխագուշակել:
Խաղից առաջ «Ատլետիկոյի» գլխավոր մարզիչ Դիեգո Սիմեոնեն նշել էր, որ «Ռեալը» մեկնարկից սկսելու գրոհել արագ գնդակ խփելու նպատակով: Այսինքն, հյուրերը պետք է պատրաստ լինեին մրցակցի ճնշմանը: Խաղի ընթացքը ցույց տվեց, որ գիտենալն ու կարողանալը միևնույն բանը չեն: Արքայական ակումբը, մինչև Ռոնալդուի խփած առաջին գնդակը, կարող էր ավելի շուտ բացել խաղի հաշիվը: Ակումբային մակարդակով Եվրոպայի ամենահուսալի պաշտպանությունը ունեցող «Աթլետիկոն» չկարողացավ դիմանալ պաշտպանությունում:
Առաջին խաղակեսում «Ռեալը» բացահայտ առավելություն ուներ խաղային բոլոր գործոններով: Գնդակով և առանց գնդակի տեղաշարժերով, ֆուտբոլիստների դիրքային հաճախակի փոփոխություններով ու խաղադաշտի կենտրոնում հստակ կազմակերպվածության շնորհիվ «Ռեալը» ոչ մի շանս չտվեց մրցակցին: «Ատլետիկոն» առաջին խաղակեսում միայն մեկ հարված կատարեց դաշտի տերերի դարպասին, այն էլ՝ շեղ: Չնայած Գամեյրոն հնարավորություն ունեցավ «Ռեալի» դարպասը գրավելու, բայց հիանալի խաղաց Կեյլոր Նավասը:
Նման դեպքերում ֆուտբոլում ասում են, որ թիմը խաղաց այնքան՝ ինչքան թույլ տվեց մրցակիցը: Իսկ «Ռեալը» ոչ մի բան թույլ չտվեց մրցակցին: Երկրորդ կեսում «սերուցքայինները» մի փոքր գցեցին խաղի տեմպը, բայց դա թակարդ էր «Ատլետիկոյի» համար, որն էլ աշխատեց: Պարզ էր, որ հյուրերը փորձելու են մրցակցի հարկի գոլ խփել, երկու հանդիպումների արդյունքում նպատակին հասնելու հնարավորությունը մեծացնելու համար: «Ռեալի» գրոհային մարտավարությունը փոխվեց՝ դառնալով հակագրոհային: Ու երկու դեպքում էլ Զիդանի թիմը պարզապես որսաց մրցակցին ու Ռոնալդուի խփած ևս երկու գնդակները «Ռեալին» ապահովեցին հաղթանակ, որն ընդհուպ մոտեցրեց թիմին եզրափակիչին:
Չեմպիոնների լիգայի պատմության մեջ դեռևս ոչ մի թիմի չի հաջողվել երկու անգամ անընդմեջ դառնալ լավագույնը Եվրոպայում: «Ռեալը» հիմա բոլոր շանսերն ունեի դա անելու համար: Իհարկե, ժամանակին «Ռեալը» հինգ անգամ դարձել է Չեմպիոնների չեմպիոն 1955-1960 թվականներին: Բայց, սկսած 1991/92 մրցաշրջանից, երբ մրցաշարը անվանափոխվեց, առայժմ ոչ մի թիմ չի հասել երկու անընդմեջ հաղթանակի: Չորս թիմ ունեցել է նման հնարավորություն, բայց գործող չեմպիոնի կոչումը կորցրել են՝ պարտվելով եզրափակիչում.
1994/95 «Միլանը» պարտվեց «Այաքսին» 0:1
1995/96 «Այաքսը» պարտվեց «Յուվենտուսին» 11 մետրանոցներով 2:4
1996/97 «Յուվենտուսը» պարտվեց Դորտմունդի «Բորուսիային» 1:3
2009/10 «Մանչեսթեր Յունայթեդը» պարտվեց «Բարսելոնային» 1:3։
Այդպիսով, «Ռեալն» արդեն ֆավորիտի կարգավիճակով է անցկացնելու պատասխան հանդիպումը «Վիսենտե Կալդերոն» մարզադաշտում: Իսկ ահա մյուս կիսաեզրափակիչը կայանալու է այսօր՝ մայիսի 3-ին: «Մոնակոն» հյուրընկալելու է «Յուվենտուսին»: Այդ խաղի մասին արդեն վաղը:
