ԵՐԵՎԱՆ, 3 մայիսի — Sputnik. 2017թ. «Մամուլի ազատության ժամանակը» մրցանակաբաշխության ժամանակ ռեժիսոր Արա Շիրինյանը մրցանակակիր դարձավ ստեղծագործական շիտակության համար։
«Հայաստանում մամուլն իր գործառույթը, այնուամենայնիվ, իրականացնում է՝ թեկուզ անազատ և կախյալ վիճակում»,- ասաց ռեժիսորը։
Նա խոստովանեց` կցանկանար իր տեղը կանգնած լիներ երիտասարդ լրագրող, որը մրցանակը ստանար լուրջ աշխատանքի համար։
Երևանի մամուլի ակումբի նախագահ Բորիս Նավասարդյանն իր հերթին նշեց, որ երկրում միշտ կգտնվեն հերոսներ, որոնք իրենց աշխատանքը կկատարեն «գերազանց», իսկ մամուլի ազատությունը տվյալ դեպքում պետության կողմից պաշտպանվածության զգացողություն է տալիս։
Հրապարակախոս Վահրամ Մարտիրոսյանը, որն անցած տարի Սարի թաղի իրադարձությունների ականատեսն է եղել, խոսեց լրագրողների հետ կապված դեպքերի մասին։
«Ես եղել եմ Սարի թաղում, երբ ոստիկանները հարձակվեցին լրագրողների վրա։ Դաժան ծեծ էր, անմարդկային, կոպիտ հայհոյանքներով, սարսափելի թշնամանքով լեցուն», — ասաց Մարտիրոսյանը։
Նրա խոսքով` 2016-ի իրադարձություններն ու ապրիլի 2-ին կայացած խորհրդարանական ընտրությունների արդյունքները ստիպում են մտածել ժամանակի ճահճացման մասին։
«Բոլոր նրանք, ովքեր Ազգային ժողովի պատգամավոր են դարձել, հավանության են արժանացել վերևներից, ուստի մամուլը համապարփակ հսկողության տակ է։ Եվ նման երևույթների ավելի ու ավելի հաճախ ես բախվում», — ասաց Մարտիրոսյանը։
«Մամուլի ազատության ժամանակը» մրցանակը, որը սահմանել են ՀՀ Ժուռնալիստների միությունը, Երևանի մամուլի ակումբը և Մեդիա նախաձեռնությունների կենտրոնը (նախկին «Ինտերնյուս»), հանձնվում է 2006 թվականից։ Մրցանակակիրների թվում են Արամ Աբրահամյանը, Տիգրան Պասկևիչյանը, Լևոն Բարսեղյանը, Էդիկ Բաղդասարյանը։ 2009-2010 թվականներին մրցանակաբաշխություն չի անցկացվել։
Դափնեկիրներին հանձնում են բրենդային ժամացույցներ։
