ԵՐԵՎԱՆ, 3 մայիսի — Sputnik. «Էրեբունի» բժշկական կենտրոնում այսօր առավոտյան լույս աշխարհ եկած հնգյակի առողջական վիճակը մասնագետները գնահատում են ծայրահեղ ծանր։ Այս մասին հայտնում է ՀՀ առողջապահության նախարարության մամուլի ծառայությունը:
«Մասնագետներն ամեն ինչ անում են փոքրիկների կյանքը փրկելու համար»,- նշված է հաղորդագրության մեջ։
Նշենք, որ փոքրիկները (չորս աղջիկ և մեկ տղա) ծնվել են այսօր առավոտյան, ժամը 04:00-ին: Նրանք լույս աշխարհ են եկել 600, 820, 840, 840 և 880 գրամ քաշով։ Անհրաժեշտ վերակենդանացման միջոցառումներ ցուցաբերելուց անմիջապես հետո նորածիններից երկուսը` տղան և աղջիկներից մեկը, տեղափոխվել են «Մուրացան» բժշկական համալիր` ՀՀ ԱՆ գլխավոր մանկական ռեանիմատոլոգ Հրանտ Կալենտերյանի հսկողության ներքո։
Նորածիններից մեկը տեղափոխվել է «Սուրբ Աստվածամայր» ԲԿ-ի, իսկ մյուսը` Մոր և մանկան առողջության պահպանման գիտահետազոտական կենտրոնի վերակենդանացման բաժանմունքներ։
Փոքրիկներից մեկը մնացել է «Էրեբունի» ԲԿ-ի նորածնային վերակենդանացման բաժանմունքում։
Բոլոր 5 փոքրիկները կյանքի առաջին իսկ րոպեներին ինտուբացվել են, ապա կլինիկաներում նրանց միացվել են արհեստական շնչառական սարքեր։
Մոր և մանկան առողջության պահպանման գիտահետազոտական կենտրոնում ՀՀ առողջապահության նախարարության գլխավոր նեոնատոլոգ Պավել Մազմանյանի հսկողության տակ գտնվող փոքրիկը ժամը 12-ի դրությամբ սկսել է շնչել առանց արհեստական շնչառական սարքի։
