ԵՐԵՎԱՆ, 2 մայիսի – Sputnik. Ղարաբաղի զինուժն ուշի-ուշով հետևում է հայ-ադրբեջանական սահմանի երկայնքով ընթացող թուրք-ադրբեջանական զորավարժություններին: Sputnik Արմենիայի հետ զրույցում ասաց ԼՂՀ նախագահի մամուլի խոսնակ Դավիթ Բաբայանը:
«Արցախի սահմաններին կամ Հայաստանին ուղղված որևէ վտանգ չկա, և իրավիճակն ամբողջությամբ վերահսկվում է»,- ասաց նա:
Այդուհանդերձ, արցախյան բանակն այս օրերին բերվել է ամենաբարձր պատրաստականության և հետևում է սահմանից այն կողմ տեղի ունեցող զարգացումներին:
Անդրադառնալով զորավարժություններին` Բաբայանը նշեց, որ ռազմական առումով դրանց նպատակը Ադրբեջանի ոտնահարված պատիվը և ապրիլյան պատերազմից հետո կրած կորուստները փոխհատուցելն է: Իսկ Թուրքիայի մասնակցությունը նպատակ ունի ցույց տալու, որ ավագ եղբայրը միշտ կանգնած է կրտսեր եղբոր կողքին:
«Իսկ աշխարհաքաղաքական առումով սա, կարծում եմ, լուրջ մեսիջ է ամբողջ քաղաքակիրթ աշխարհին: Թուրքիան սրանով ցույց է տալիս, որ ինքը փորձում է ինչ-որ դերակատարություն ունենալ հարավկովկասյան տարածաշրջանում: Բնական է, սա մարտահրավեր է` ուղղված հայոց պետականությանն առաջին հերթին, նաև ՌԴ-ին, Իրանին, ՆԱՏՕ-ին ու ԱՄՆ-ին: Որովհետև ԱՄՆ-ն և Ֆրանսիան, լինելով ՆԱՏՕ-ի անդամ երկրներ, միաժամանակ նաև ԵԱՀԿ ՄԽ համանախագահող երկրներ են, և ամեն ինչ անում են, որպեսզի տարածաշրջանում խաղաղություն ու կայունություն պահպանվի: Իսկ Թուրքիան նման քայլով, փաստորեն, ոտնահարում է իր իսկ դաշնակից երկրների ջանքերն ու արժանապատվությունը»,- ասաց Բաբայանը:
Որպես շարունակություն` Թուրքիայում Էրդողանը հայտարարում է, որ դժգոհ է Սիրիայում ԱՄՆ-ի քայլերից:
Բայց այս քաղաքականությունը, Դավիթ Բաբայանի համոզմամբ, ո՛չ Թուրքիային, ո՛չ էլ նրա դաշնակից Ադրբեջանին դիվիդենտներ չի բերի, հակառակը՝ նրանք կհայտնվեն մեկուսացած վիճակում:
