ԵՐԵՎԱՆ, 1 մայիսԻ — Sputnik. Մայիսի 1-ին հայտնի դարձան «Ավրորա» գեղարվեստական մրցույթի հաղթողները: Մրցույթին իր գեղանկարով հաղթել է 7-ամյա Արփի Ղազարյանը, որը Երևանի Իգիթյանի անվան ազգային գեղագիտական կենտրոնի սան է:
Երկրորդ մրցանակը ստացավ 13-ամյա Սոֆյա Յակովլևան՝ Ռուսաստանի Սարատով քաղաքի Գեղարվեստի մանկական ստուդիայից, երրորդ հորիզոնականում Երևանի «Գասպարյան» արտ-ստուդիայի սան 11-ամյա Աննա Կոստանյանի գեղանկարն է:
«Ավրորա» մարդասիրական նախաձեռնությունը մասնագիտական ժյուրիի որոշմամբ հատուկ մրցանակներ է շնորհվել մրցույթի երկու մասնակիցների՝ Ժասմինա Հովհաննիսյանին (11 տարեկան, Ներքին Գետաշեն,) և Ռուդոլֆ Ավանեսյանին (14 տարեկան,Երևան):
Մրցույթի հաղթողները պարգևատրվեցին մրցանակներով և բացառիկ հնարավորություն ստացան մասնակցելու 2017թ. «Ավրորա» մրցանակի շնորհման արարողությանը, որը կկայանա մայիսի 28-ին Երևանում:
«Մրցույթին երեխաների մասնակցության թիվը շատ տպավորիչ էր: Մրցույթի միջոցով նրանք հնարավորություն ունեցան արժևորել իրենց աշխատանքը, իմացան, որ կարևոր գործ են անում, ոգևորվեցին, — ասաց «Ավրորա» գեղարվեստական մրցույթի ժյուրիի անդամ Տիգրան Մատուլյանը, — մենք գնահատել ենք աշխատանքի՝ թեմային համապատասխանությունը և երեխայի ազնվությունը, ինչպես նաև աշխատանքի որակը: Բոլորն էլ լավ աշխատանքներ են ներկայացրել, բայց մենք ստիպված էինք ընտրել լավագույնները: Բոլոր երեխաներն էլ հաղթել են՝ մասնակցելով այս մրցույթին»:
Մրցույթի հաղթողները պարգևատրվեցին Երևանի Հովհաննես Թումանյանի թանգարանում, որտեղ նաև կազմակերպվել է ցուցահանդես՝ մրցույթին ներկայացված 63 լավագույն աշխատանքներով: Ցուցահանդեսն այցելուների համար բաց կլինի մինչև մայիսի վերջ, երբ կամփոփվեն «Ավրորա» մրցանակի հիմնական միջոցառումները:
«Ավրորա» գեղարվեստական մրցույթին, որը հայտարարվել էր 2017թ. հունվարին, մասնակցել են 7-14 տարեկան երեխաներ: Մրցույթին ներկայացվել են հազարից ավելի աշխատանքներ Հայաստանից, Արցախից, Ռուսաստանից, Ղրղըզստանից, Վրաստանից, Թուրքիայից, ԱՄՆ-ից, Կանադայից, Վենեսուելայից և Ֆրանսիայից:
