ԵՐԵՎԱՆ, 1 մայիսի — Sputnik. Հայաստանը լավ ցատկահարթակ է իրանցի ձեռնարկատերերի համար` Եվրասիական միության երկրների շուկա դուրս գալու համար։ Այս մասին ասել է Իրանում Հայաստանի դեսպան Արտաշես Թումանյանը Կենտրոնական Ասիայից նավթային արտահանման զարգացմանը նվիրված աշխատանքային խմբի նիստի ժամանակ։ Տեղեկությունը հայտնում է իրանական IRNA գործակալությունը։
Նրա խոսքով` թեև Հայաստանի բնակչությունը մոտավորապես 3 միլիոն է կազմում, այնուհանդերձ երկիրը կարող է Իրանին Եվրասիական միության 180-միլիոնանոց շուկա դուրս գալու հնարավորություն ընձեռել։ Նա նշել է, որ իրանցի գործարարներն իրենց ապրանքը կկարողանան Հայաստանից ԵԱՏՄ արտահանել առանց մաքսային վճարների։
Թումանյանն ընդգծել է նաև, որ քաղաքական հարաբերությունների բարձր մակարդակը չի համապատասխանում տնտեսական գործակցության տեմպերին։ Այս պահին երկու երկրի միջև ապրանքաշրջանառությունը կազմում է 300 միլիոն դոլար, սակայն, կողմերի կարծիքով, ավելացման ներուժը հսկայական է։
