ԵՐԵՎԱՆ, 1 մայիսի — Sputnik. Այս տարի ապրիլի 24-ին նա անմոռուկի տեսքով Kimoji էր հրապարակել թվիթերյան իր էջում, մասնակցել «Խոստում» ֆիլմի I promise ակցիային: Չմոռանանք, որ անցած տարի նա հակընդեմ հոդվածով հանդես եկավ հեղինակավոր Waal street journali_ի հակահայկական հոդվածի դեմ, ինչը մեծ աղմուկ բարձրացրեց: Հոդվածում ժխտվում է Հայոց ցեղասպանության իրողությունը։ Քարդաշյանը բավականին կոշտ գնահատականներ էր հնչեցրել այդ հակահայկական հոդվածի հասցեին։
«Փողը խոսում է, և այս պահին այն խոսում է աղբի մասին»,- այսպես է սկսել Քիմն իր հոդվածը:
Wall Street Journal-ի հոդվածը Քարդաշյանն անվանել է անհեթեթություն, ընդգծել, որ այն հիասթափեցնող ու վտանգավոր է։
«Եթե դա աներ ինչ-որ էժանագին ամսագիր, հասկանալի կլիներ, բայց երբ անում է նման հեղինակավոր պարբերականը, ինչպիսին Wall Street Journal-ն է, Հայոց ցեղասպանության վրա գումար վաստակելու համար, ամոթալի և անթույլատրելի է:
Իմ ընտանիքն ու ես անծանոթ չենք մամուլում տեղ գտնող անհեթեթություններին: Մենք սովորել ենք անտեսել դրանք: Ստերը լավ վերնագրեր են ունենում, լավ վերնագրերը` լավ շապիկներ, որոնք էլ, իրենց հերթին, լավ վաճառվող ամսագրեր են դառնում։ Երբ լսեցի Wall Street Journal-ում Հայոց ցեղասպանությունը ժխտող գովազդի մասին, չէի կարող դա անտեսել»,-գրել է Քիմ Քարդաշյանը։
Գովազդի համար վճարել է համացանցի թուրքական հարթակը։
Քիմը պատմել է, որ ի պատասխան իրենց հարցումների պարբերականը ասել է, թե իրենք տպում են լայնածավալ գովազդներ, այդ թվում` սադրիչ թեմաներով։
«Բազում պատմաբաններ կարծում են, որ եթե Թուրքիան պատասխանատվություն կրեր Ցեղասպանության համար, Հոլոքոսթը չէր լինի։ 1939թ. Լեհաստան ներխուժելուց մեկ շաբաթ առաջ Հիտլերն ասում էր. «Այսօր ո՞վ է հիշում հայերի մասին»։ Մենք հիշում ենք և պետք է հիշենք: Մենք պետք է խոսենք այդ մասին մինչև մեր կառավարությունը ճանաչի այն, քանի որ, ժխտելով անցյալը, վտանգում ենք մեր ապագան: Երբ մենք լռում ենք գումարի, վախի և ուժի դիմաց, սովորեցնում ենք մեր երեխաներին, որ ճշմարտությունն անկարևոր է:
Մենք պետք է պատասխանատու լինենք մեր երեխաներին փոխանցած մեսիջի համար: Մենք պետք է հարգենք պատմական Ճշմարտությունները, որպեսզի պաշտպանենք մեր ապագան: Պետք է ավելի լավ գործենք»,- գրել է Քիմը:
Անդրադառնալով ամսագրի պնդմանը, թե իրենք ընդամենը բազմազան գովազդային նյութեր են տպում` Քիմն ասել է, որ եթե դուք իրականացնում եք Ցեղասպանության համար պատասխանատու երկրի քարոզչությունը, դուք չեք ներկայացնում «սադրիչ կարծիք», դուք կեղծիք եք տարածում: Դա միանգամայն անմիտ, ավելին` վտանգավոր քայլ է։ Եթե դա լիներ գովազդ Հոլոքոսթի կամ 9/11-ի դավադրության մասին, կտպեի՞ք, հարց է հղում ամսագրի խմբագրությանը հայտնի հեռուստաաստղը։
