ԵՐԵՎԱՆ, 30 ապրիլի — Sputnik. Georgian Airways — Airzena վրացական ավիաընկերությունը դիմել է պետության օգնությանը` արտասահմանյան խոշոր ավիաընկերություններին մեղադրելով ավիատոմսերի ցածր գներ առաջարկելու մեջ: Այս մասին հայտնում է Sputnik Գրուզիան:
Վրաստանում տարեցտարի շատանում են այն ընկերությունները, որոնք ուղևորներին գրավելու համար ցածր գներ են առաջարկում: Airzena-ն, որը Վրաստանում գործում է 1993 թվականից, որոշ ժամանակ միակ ավիաընկերությունն էր, որը չվերթեր էր իրականացնում պահանջարկ ունեցող ուղություններով:
«Մենք անդադար աշխատում ենք անառողջ մրցակցության պայմաններում: Ավելին՝ «Վրաստանի օդանավակայանների միությունը» Վրաստանում առավելագույն արտոնություններ է տալիս արտասահմանյան ավիաընկերություններին, որոնք առանց այդ էլ արտոնություններ ունեն իրենց երկրներում», — գրված է ավիաընկերության Facebook-յան էջում:
Հաղորդագրության մեջ նշված է, որ չնայած դժվարություններին՝ Airzena-ն մտադիր է շարունակել թռիչքները Ամստերդամ, Վիեննա, Մոսկվա, Թել Ավիվ ուղղություններով, ինչպես նաև ուղևորների խնդրանքով ավելացնել նոր ուղղություններ դեպի Լոնդոն, Կիև, Փարիզ, Պրահա, Կազան և Սոչի:
«Մենք անում ենք ամեն բան, որպեսզի վրացական ավիացիան պահպանվի և վերջնականապես չվերանա: Մենք խնդրում ենք բոլոր իրավասու կառույցներին, որոնք պարտավոր են արդար պայմաններ ապահովել, կործանումից փրկել վրացական ավիացիան», — գրված է հայտարարության մեջ:
Վրաստանի իշխանություններն ու մրցակից ընկերությունները դեռ պաշտոնական որևէ մեկնաբանություն չեն արել: Երկրում նշված հարցերով զբաղվում է մրցակցության գործակալությունը, որն իր կարծիքը հայտնում է հարցն ուսումնասիրելուց հետո:
