ԵՐԵՎԱՆ, 30 ապրիլի — Sputnik, Դավիթ Գալստյան. «Օմսկիե յաստրեբի» թիմի հարձակվող, ռուսական հոկեյի աստղ Արտյոմ Մանուկյանը սերտ կապեր ունի պատմական հայրենիքի հետ և հպարտանում է իր հայկական արմատներով: Այդ մասին Մանուկյանն ասել է Sputnik Արմենիայի թղթակցի հետ զրույցում:
Երիտասարդական հավաքականի կազմում հանդես գալով առաջին անգամ՝ երիտասարդ հարձակվողն օգնեց իր թիմին հաղթանակ տանել Սլովակիայում անցկացվող «Հինգ ազգերի մրցաշարում»:
Նրա եղբայրը ծնվել է Հայաստանում, իսկ Արտյոմը՝ Օմսկում, որտեղ նրանց հայրը տեղափոխվել էր Աֆղանստանում ծառայելուց հետո:
«Հայրս մեզ բերեց «Տոպոլինի» պալատ, հագցրեց ավագ եղբորս ու դուրս բերեց սառույցի վրա: Եղբայր փորձեց սահել, բայց չկարողացավ ու սկսեց լացել: Ես խնդրեցի, որ ինձ էլ թույլ տան փորձել: «Ես կկարողանամ», — ասացի հորս: Սակայն հայրս թույլ չտվեց, հաջորդ օրը մենք նորից եկանք, ես դուրս եկա սառույցի վրա, ինձ անմիջապես դուր եկավ: Եղբայրս էլ միտքը փոխեց, ու մենք սկսեցինք հաճախել պարապմունքների», — պատմեց Մանուկյանը:
Հայաստանում Արտյոմը շատ բարեկամներ ունի, այստեղ են ապրում նաև նրա տատն ու պապը: Տարվա մեջ մի քանի անգամ եղբոր հետ մի քանի օրով գալիս է Հայաստան:
Ասում է, որ կովկասյան խառնվածքն արտահայտվում է իր բնավորության մեջ:
«Զիջել չեմ կարողանում, ինձ դուր չի գալիս պարտվելը, միշտ ուզում եմ պայքարել… Հպարտ եմ, որ հայ եմ», — ասում է Արտյոմը:
Խաղից առաջ հայրը ոգևորում է որդիներին, հաջողություն մաղթում, ասում, որ «չհանձնվեն և պայքարեն մինչև վերջ». մնացածը նրանք ինքները գիտեն (երկու եղբայրներն էլ խաղացել են «Օմսկիե յաստրեբի» թիմում):
Արտյոմը հույս ունի մասնակցել աշխարհի առաջնությանը երիտասարդական հավաքականի կազմում: Դրա համար, հոկեյիստի խոսքով, «պետք է աշխատի, մարզվի, դրսևորի իրեն»: Միայն քրտնաջան աշխատանքով կարելի է հասնել ուզածին:
«Ամռանը պետք է նախապատրաստվեմ, փորձեմ համալրել Հոկեյի մայրցամաքային լիգայի թիմը, իսկ հետո պարզ կլինի: Պետք է ջանալ, ապացուցել, որ արժանի ես դրան», — ընդգծեց Արտյոմը:
«Օմսկիե յաստրեբին» Օմսկի հոկեյի երիտասարդական ակումբն է, որը ստեղծվել է Օմսկի «Ավանգարդի» բազայի վրա: Ակումբը Խարլամովի գավաթի կրկնակի չեմպիոն է, «HockeynightinBoston» միջազգային մրցաշարի չեմպիոն և 2013 թվականի երիտասարդական ակումբային թիմերի շարքում Աշխարհի գավաթի հաղթող:
