Շաբաթվա մարդիկ

Ռուբեն

Ռուբենը պատմեց, որ մասնագիտությամբ պատմության ուսուցիչ է։ Ավարտել է Մոսկվայի պետական համալսարանը։ Երկու տարի է, ինչ աշխատում է, ինչպես ինքն ասաց՝ Հայ առաքելական երեղեցում, եկեղեցական ժողովի անդամ է։

-Փոքր ժամանակ երազում էի ոստիկան դառնալ։

Ապագայում շատ է ցանկանում հոգևորական դառնալ։

Անի Հակոբյան

Ավարտել է Եվրոպական ակադեմիայի միջազգային հարաբերություններ ֆակուլտետը: Շուրջ 6 տարի է, ինչ հեռուստալրագրող է, միևնույն ժամանակ՝ հանդիսանում է newmag ամսագրի կայքի խմբագիրը:

-Փոքր ժամանակ տիկնիկների փոխարեն շատ խաղալիք զենքեր ունեի: Նույնիսկ դրանց պատճառով հայրիկիս դպրոց էին կանչել: Դպրոցից դուրս եկանք ու հայրիկս ինձ մի նոր զենք գնեց: Ասածս ինչ է… Փոքր ժամանակ ուզում էի զինվորական կամ ոստիկան լինել, ինչ-որ մի ուժային կառույցում աշխատել:

Ապագայի մասին խոսել չի սիրում՝ վախենում է: Ասում է, որ բնությունը միշտ հաղթում է ու համարում է, որ միակ ելքը՝ ապրել ներկայով:

Տիգրան Ճորոխյան

Մասնագիտությամբ քաղաքագետ է, քաղաքական գիտությունների թեկնածու:

eli.am յուրօրինակ նվերների խանութի ու eli.fun զբոսաշրջային ու ժամանցային հարթակի համահիմնադիր տնօրենն է։

-Փոքր ժամանակ երբեք չեմ ֆիքսվել մեկ մասնագիտության վրա։ Բայց երկու բան կար, որ միշտ ձգտել եմ պահպանել իմ մեջ. միշտ լինել առաջինը (դառնալ հաջողակ սպորտսմեն՝ ֆուտբոլիստ, ըմբշամարտիկ, հեծանվորդ), օգտակար լինել միջավայրին, մի լավ բան անել ու բարելավել մտերիմներիս, համաքաղաքացիներիս կամ ամբողջ մարդկության կյանքը:

Ինքն իրեն խոստացել է, որ առաջին միլիոնը վաստակելուց հետո կստեղծի կրթության զարգացման հիմնադրամ, քանի որ դրանում է տեսնում փոփոխության ամենաուղիղ ճանապարհը։

Էմմա Հարությունյան

Մասնագիտությամբ հայ միջնադարյան արվեստի պատմաբան է և տեսաբան:

Արվեստաբան է և համադրող: Շուրջ 4 տարի է, ինչ աշխատում է որպես արվեստաբան ու համադրող։

-Փոքր ժամանակ ուղղակի երազում էի Մայքլի պես պարել ու օդաչու լինեի:

Ասում է, որ ապագայում ռեալիզացնելու է իր բոլոր ցուցահանդեսներն ու նախագծերը ու, ինչպես ինքն ասաց, չտեսի պես, ճամփորդելու է ու բարություն է սփռելու:

Նարեկ Թովմասյան

2006 թ-ից ղեկավարում է Բրիտանական խորհրդի արվեստի ծրագրերի բաժինը:
Ունի արվեստագիտության թեկնածուի գիտական աստիճան: Արվեստի կառավարում մասնագիտությամբ վերապատրաստվել է Զալցբուրգում և Ամստերդամում:

-Միշտ ուզեցել եմ ոսկերիչ դառնալ, անգամ գնացել եմ խմբակ ու սովորել հիմունքները: Երևի, համապատասխան ուղղորդման արդյունքում կհաջողեի, սակայն...

Ապագայում ցանկանում է արտադրել հայկական բարձրորակ վիսկի, որը կլինի առաջատարներից մեկը համաշխարհային շուկայում:

Մերի Հակոբյան

Սովորում է կոնսերվատորիայի լարային բաժնում, ջութակահար է: Ավելի քան 3 տարի է՝ աշխատում է Հայաստանի պետական երիտասարդական նվագախմբում:

-Երբ փոքր էի՝ ուզում էի մի մասնագիտություն ունենալ, որը կօգնի շատ ճանապարհորդեմ: Ստացվեց այնպես, որ դարձա երաժիշտ ու ճանապարհորդում եմ:

Ապագայում ցանկանում է ունենալ իր սեփական տուրիստական գործակալությունը:

Արթօ Վաոն

Պոետ է և երաժիշտ: ՀԱՀ (Հայաստանի Ամերիկյան Համալսարան)-ի պրոֆեսոր է, ինչպես նաև նույն համալսարանում ստեղծագործական գրականության կենտրրոնի հիմնադիրն է և տնօրենը:

-Հետաքրքիր է, որ փոքրուց երազել եմ լինել այն, ինչ եմ, այսինքն՝ պոետ և երաժիշտ:

Արտոն կարծում է, որ ինչքան էլ աշխարհը խառնված է, ինքը հույսով է լցված ապագայի հանդեպ: «Ամեն օր, երբ լսարան եմ մտնում, աշակերտներիս աչքերի մեջ մեծ խանդավառություն ու քաղց եմ տեսնում գրականության, ինքնարտահայտման նկատմամբ, նրանք մեծ ցանկություն ունեն ավելի լավ ապագա կառուցելու: Ու ես միշտ նրանց կողքին եմ լինելու»,- ավելացրեց Արթոն: