ԵՐԵՎԱՆ, 29 ապրիլի — Sputnik. «Հայ-ռուսական երիտասարդական միություն» (ՀՌԵՄ) հասարակական կազմակերպության ակտիվիստները միացել են «Հիշում եմ։ Հպարտանում եմ» հայրենասիրական ակցիային՝ Երևանի կենտրոնում անցորդներին գեորգիևյան ժապավեններ բաժանելով։
ՀՌԵՄ հասարակական կազմակերպության փոխնախագահ Սերգեյ Վարդազարյանը Sputnik Արմենիայի ասաց, որ արդեն յոթ տարի շարունակ կազմակերպությունը անցկացնում է «Գեորգիևյան ժապավեն։ Հիշում եմ։ Հպարտանում եմ» ակցիան։
«Ամեն տարի ապրիլի վերջից մայիսի սկիզբը մենք դուրս ենք գալիս Երևանի փողոցներ ու անցորդներին բաժանում գեորգիևյան ժապավեններ, որոնք հաղթանակի խորհրդանիշն են։ Ինչպես հայտնի է, մայիսի 9-ը հայերի համար ոչ միայն Մեծ հայրենական պատերազմի հաղթանակի, այլև Շուշիի ազատագրման օրն է։ Դրա համար մենք կենտրոնանում ենք ոչ միայն Մեծ հայրենական պատերազմի, այլև հայկական տոների վրա»,- նշեց Վարդազարյանը։
Հայ-Ռուսական համալսարանի (ՀՌՀ) ուսանող Հրանտ Սարկիսովը, որը մասնակցել է ապրիլյան պատերազմին և վերադարձել է բանակից, շատ ուրախ է, որ առաջին անգամ միացել է ակցիային։
«Ես ուրախ եմ, որ նման ակցիաներ կան, քանի որ երիտասարդների մեծամասնությունը չգիտի, չի հասկանում՝ գեորգիևյան ժապավենն ինչ նշանակություն ունի, և ինչ ներդրում ունեն մեր պապերը Մեծ հայրենականում հաղթելու գործում»,- ասաց Սարկիսովը։
Նրա խոսքով՝ գեորգիևյան ժապավենը խորհրդանշում է ԽՍՀՄ կազմում գտնվող բոլոր ազգերի ու բոլոր երկրների հաղթանակը։
Անցորդների թվում նաև ռուսաստանցի զբոսաշրջիկներ կային, որոնք շնորհակալություն հայտնեցին հայ երիտասարդներին, որ նրանք չեն մոռանում Մեծ Հաղթանակի մասին։
«Ցանկացած հիշողությունը թանկ է, հատկապես՝ նոր սերնդի համար, որը վատ է պատկերացնում, թե ինչպես է դա եղել։ Սարսափելի պատերազմ էր։ Պապս էլ է կռվել, բայց միայն միասին մենք հաղթեցինք»,- նշեց Իլյան՝ Պերմից։
Նա հավելեց, որ գեորգիևյան ժապավենների ակցիան նրա համար հաճելի անակնկալ էր։
Օրերս Հայաստանում մեկնարկել է «Գեորգիևյան ժապավեն» ակցիան»։ «Հիշում եմ։ Հպարտանում եմ» հայրենասիրական ակցիան նվիրված է 1941-1945 թթ Մեծ հայրենական պատերազմում հաղթանակի 72-ամյակին։
Ակցիան մեկնարկել է Հայ-ռուսական երիտասարդական միության ու Հայաստանի ռուսական բուհերի ուսանողների ասոցիացիայի, Երևանում Ռուսաստանի գիտության և մշակույթի կենտրոնի աջակցությամբ։ Հասարակական կազմակերպությունների ակտիվիստները բաժանում էին գեորգիևյան ժապավեններ ու թերթիկներ, որոնք պատմում էին այդ խորհրդանշի առաջացման պատմությունը և Մեծ հայրենական պատերազմի համառոտ պատմությունը։
