ԵՐԵՎԱՆ, 28 ապրիլի — Sputnik. Գերմանիայում ռեֆորմացիայի 500-ամյակի առթիվ ապրիլի 7-ից հոկտեմբերի 15-ը գործող «Հնատիպ Աստվածաշունչ մատյաններ 100 լեզվով» խորագրով ցուցահանդեսի շրջանակում տեղի կունենա հայերեն առաջին տպագիր Աստվածաշնչի հրատարակության 350-ամյակին նվիրված ցուցադրություն Հալլեում: Այս մասին հայտնում է Franckesche Stiftungen կայքը։
Կայքի տվյալների համաձայն` Վիտենբերգի Արցախյան Ավետարանի (1225), Ամստերդամում տպված Նոր Կտակարանի (1698) և Անդրեաս Ակոլութի «Աբդիասի մարգարեությունը» առաջին հայագիտական հայ-լատինական հրատարակման հետ ցուցադրված է նաև Հենրիխ Վ. Լուդոլֆի (1655-1712) նամակագրությունը, ով Ռուսաստանի ու Արևելքի ուսումնասիրությամբ էր զբաղվում, ինչը վկայում է Ֆրանկե հիմնադրանի սերտ կապի մասին Ամստերդամի հայտնի հայ տպագրիչների` Թովմասի և Ղուկաս Վանանդեցիների հետ։
Գերմանիայում Հայաստանի դեսպանատան ներկայացուցիչները հայտնել են, որ «Հոբելյանական ցուցահանդեսի հայկական մասնաբաժինը տիպաբանորեն ընդգծում է Աստվածաշնչի թարգմանության նշանակությունն երկու ժողովուրդների մշակութային կյանքում, ինչպես նաև թարգմանիչներ Մեսրոպ Մաշտոցի և Մարտին Լյութերի մատուցած ծառայություններն իրենց ժողովուրդներին՝ ազգային գրականության ստեղծման հարցում:
