ԵՐԵՎԱՆ, 27 ապրիլի — Sputnik. ՀՀԿ մամուլի քարտուղար Էդուարդ Շարմազանովը հայտարարել է, որ Արցախի հարցում Հայաստանի դիրքորոշումը չի փոխվել:
«Մեկ անգամ չէ, որ նշել ենք՝ Երևանը դրական է գնահատում ԵԱՀԿ ՄԽ համանախագահների, նաև ՌԴ ԱԳՆ դերակատարությունը ԼՂ խնդրի խաղաղ կարգավորման գործում։ Բազմաթիվ անգամ ենք ասել նաև, որ Լեռնային Ղարաբաղի խնդրի խաղաղ հանգուցալուծման ու առաջընթացի համար կա մեկ խոչընդոտ՝ Ադրբեջանի ապակառուցողական մոտեցումը»,- ՀՀԿ ԳՄ նիստից հետո լրագրողներին ասաց Շարմազանովը:
Նրա խոսքով՝ Վիեննայի ու Սանկտ Պետերբուրգի հանդիպումներում ձեռք բերված պայմանավորվածությունները պետք է կյանքի կոչվեն։
«Եթե դրանք կյանքի չեն կոչվում կամ մասամբ են կյանքի կոչվում՝ բացառապես Ադրբեջանի ապակառուցողական մոտեցմամբ է», — ընդգծեց Շարմազանովը։
Նշենք, որ ավելի վաղ ձեռք բերված պայմանավորվածության համաձայն` ապրիլի 28-ին Մոսկվայում կանցկացվի Ռուսաստանի, Հայաստանի և Ադրբեջանի արտաքին գործերի նախարարների հանդիպումը Լեռնային Ղարաբաղի հակամարտության կարգավորման հարցերի շուրջ:
