ԵՐԵՎԱՆ, 27 ապրիլի — Sputnik. Գյումրիի «Շիրակ» ֆուտբոլային ակումբի մամուլի ծառայությունն անդրադարձել է այն տեղեկությանը, ըստ որի՝ թուրքական «Գալաթասարայը» հետաքրքրված է «Շիրակի» ֆուտբոլիստ Վահան Բիչախչյանի ծառայություններով:
«Տեղեկություններ են տարածվել, որ թուրքական «Գալաթասարայը» հետաքրքրված է «Շիրակի» 17-ամյա ֆուտբոլիստ Վահան Բիչախչյանով։ Պաշտոնապես տեղեկացնում ենք, որ «Շիրակ» ֆուտբոլային ակումբը չի ստացել ոչ մի առաջարկ թուրքական ակումբից»,- նշված է հայտարարության մեջ։
Ակումբից հայտնում են նաև, որ եթե անգամ նման առաջարկ լիներ, և՛ Վահան Բիչախչյանը, և՛ ակումբի ղեկավարությունը չեն համաձայնվի, որպեսզի երիտասարդ ֆուտբոլիստը տեղափոխվի Թուրքիա։
