ԵՐԵՎԱՆ, 27 ապրիլի — Sputnik. «Եվրատեսիլի» հայ մասնակից Արծվիկ Հարությունյանը հույս ունի, որ Ռուսաստանի ներկայացուցիչ Յուլիա Սամոյլովան, որին Ուկրաինայի Անվտանգության ծառայությունն արգելել է մուտք գործել Կիև, կկարողանա ելույթ ունենալ մյուս տարի։ Այս մասին Արծվիկը խոսել է լրագրողների հետ հանդիպման ժամանակ։
Եվրոպական հեռարձակման միությունը (EBU) ապրիլի 13-ին հայտարարել է, որ Ռուսաստանը չի կարողանա մասնակցել «Եվրատեսիլ 2017» երգի միջազգային մրցույթին: Ուկրաինան Յուլիա Սամոյլովային արգելել է մասնակցել մրցույթին` պատճառաբանելով, որ նա 2015 թվականին եղել է Ղրիմում։
«Ինչպես ես, այնպես էլ նա, հավատում էր իր երազանքին։ Շատերը նրան նայելով ոգեշնչվում են, երազում։ Ես կուզեի, որ նա մասնակցեր մրցույթին։ Չէ որ դա երաժշտության մրցույթ է, մենք երաժշտություն, բարություն, դրական լիցքեր ենք տարածում աշխարհում։ Հուսով եմ, որ մյուս տարի նրա երազանքը կիրականանա, և նա անպայման կներկայացնի իր երկիրը», — ասաց Հարությունյանը։
«Եվրատեսիլի» հայկական պատվիրակության ղեկավար Գոհար Գասպարյանն իր հերթին նշեց, որ տհաճ է, երբ քաղաքականությունը ներխուժում է երաժշտական ոլորտ, և այսպիսի խնդիրներ են առաջանում։
«Մենք մի մասնակցի կորցրինք, այդ երաժշտական տոնին մի մարդ պակաս կլինի», — ասաց Գասպարյանը։
«Եվրատեսիլ-2017» մրցույթն այս տարի կանցկացվի մայիսի 9-ին, 11-ին և 13-ին Կիևում: Հայաստանի ներկայացուցիչը՝ Արծվիկը, ելույթ կունենա մայիսի 9-ին՝ 1-ին կիսաեզրափակչի ընթացքում: Մրցույթն այս տարի կանցկացվի «Տոնենք բազմազանությունը» կարգախոսի ներքո:
