ԵՐԵՎԱՆ, 27 ապրիլի – Sputnik. ՀՀ քննչական կոմիտեի ՀԿԳ քննության գլխավոր վարչության վարույթում քննվող քրեական գործի շրջանակում երեկ ձերբակալվել է ՀՀ-ում ԵՄ պատվիրակության դրամաշնորհային ծրագրերի համակարգող Մարինե Պապյանը՝ առանձնապես խոշոր չափերի գումարի հափշտակություն կատարելու կասկածանքով: Այս մասին Sputnik Արմենիային հայտնեց Քննչական կոմիտեի նախագահի խորհրդական Սոնա Տռուզյանը:
Հիշեցնենք` ՀՀ-ում Եվրոպական միության պատվիրակության կողմից հատկացված դրամաշնորհների գումարներից կատարված հափշտակությունների վերաբերյալ Քննչական կոմիտեում քրեական գործ էր հարուցվել 2016 թ–ի հունվարին։:
Ըստ Քննչական կոմիտեի ավելի վաղ հրապարակած տվյալների` դեռևս 2012թ-ին մի խումբ անձինք կեղծ փաստաթղթերով մշակել էին «Հիմնարար իրավունքներն ու ազատությունները՝ ապագայի երաշխիք» ծրագիրը, որը ներկայացրել էին ՀՀ-ում ԵՄ պատվիրակության գրասենյակ, և դրա իրականացման համար դրամաշնորհ ստացել:
Եվրոպական միության պատվիրակությունը քրեական գործով ճանաչվել էր տուժող, ևս 13 անձ ներգրավվել է որպես մեղադրյալ`Տիգրան Սուքիասյանը, Գևորգ Ղազարյանը, Ռուբինա Տեր-Մարտիրոսյանը, Արմեն Բարեղամյանը, Անահիտ Ավագյանը, Սերգեյ Բալասանյանը, Դինա Մանուկյանը, Կարեն Ստեփանյանը, Թերեզա Դիլանյանը, Ալեքսանդր Պողոսյանը, ինչպես նաև Հրայր Գյոնջյանը, Գարիկ Չիլինգարյանը և Գեղամ Պետրոսյանը։ Վերջին երեք անձի նկատմամբ հայտարարվել է հետախուզում։
