ԵՐԵՎԱՆ, 27 ապրիլի — Sputnik, Գոհար Սարգսյան. Քաղցկեղը դատավճիռ չէ, կա բուժում, և դա պետք է հասկանան բոլորը։ Օդանավակայանում Sputnik Արմենիայի թղթակցի հետ զրույցում համոզված ասաց Հորդանանի արքայադուստր Դինա Մայրեդը։
![Принцесса Иордании Майред прибыла в Армению Принцесса Иордании Майред прибыла в Армению - Sputnik Արմենիա](https://cdn.am.sputniknews.ru/img/714/68/7146866_0:0:1600:1067_600x0_80_0_0_38a73a93c3f9ca195137251853dbb8cb.jpg)
«Քաղցկեղն այսօրվա մեծագույն խնդիրներից մեկն է, և մեզնից յուրաքանչյուրն այս կամ այն կերպ առնչություն ունի այդ հիվանդության հետ»,- ասաց Մայրեդը։
Դինա Մայրեդը Քաղցկեղի վերահսկման միջազգային միության նախագահն է։ Սակայն այս ուղին ընտրելու համար նա կոնկրետ դրդապատճառներ է ունեցել։ Տարիներ առաջ արքայադստեր որդու մոտ սուր լեյկոզ են ախտորոշել։ Սկզբում էմոցիաներն են գլուխ բարձրացել, հետո սկսել է պայքարի շրջանը։ Այսօր Դինա Մայրեդի որդին առողջ է, սովորում է համալսարանում, իսկ հիվանդության մասին չի էլ հիշում։
«Յուրաքանչյուր մոր համար էլ դժվար է, երբ երեխայի մոտ քաղցկեղ են հայտնաբերում։ Երբ որդիս բուժվեց, որոշեցի միանալ քաղցկեղի դեմ պայքարին ու օգնել, որ բոլոր երեխաներն ունենան քաղցկեղի դեմ պայքարելու հնարավորությունը»,-ասաց նա։
Վաղ առավոտից Դինա Մայրեդն այցելեց ԵՊԲՀ «Մուրացան» հիվանդանոցային համալիրի քիմիաթերապիայի կլինիկա, այնուհետև շարժվեց դեպի «Իզմիրլյան» բժշկական կենտրոն և Ռ. Յոլյանի անվան արյունաբանական կենտրոն։ Հանդիպելով քաղցկեղային հիվանդություններ ունեցող երեխաների հետ` նա չկարողացավ զսպել արցունքները։ Հետո կառավարեց զգացմունքները և ծնողներին հորդորեց ուժեղ լինել ու այդ նույն ուժը փոխանցել երեխաներին։
«Համբերեք 6 ամիս։ Հետո բուժումն ավելի թեթև է ընթանում։ Ավելի պինդ եղեք»,-ասաց արքայադուստրը Ռ. Յոլյանի անվան արյունաբանական կենտրոնում։
![Արքայադուստրը հորդորում է չընկճվել Արքայադուստրը հորդորում է չընկճվել - Sputnik Արմենիա](https://cdn.am.sputniknews.ru/img/714/79/7147994_7:0:1726:1080_600x0_80_0_0_9c7914e19845bf60e84b1db2b04ead47.jpg)
![Փոքրիկն էլ իր մեծ աչուկներով նայում էր մեծերին ու ժպտում` չհասկանալով մեծերի «լուրջ» զրույցը Փոքրիկն էլ իր մեծ աչուկներով նայում էր մեծերին ու ժպտում` չհասկանալով մեծերի «լուրջ» զրույցը - Sputnik Արմենիա](https://cdn.am.sputniknews.ru/img/714/81/7148162_0:0:1718:1079_600x0_80_0_0_d8bdfb618e6e7cdd3e63aeab573d22e1.jpg)
Նա այս խոսքերն ասաց 4-ամյա Դավթի մայրիկին։ Փոքրիկն էլ իր մեծ աչուկներով նայում էր մեծերին ու ժպտում` չհասկանալով մեծերի «լուրջ» զրույցը։
Արքայադուստրը նմանատիպ քաջալերող խոսքեր ուղղեց նաև մյուս ծնողներին։
Քաղցկեղի վերահսկման միջազգային միության նախագահ Նորին Մեծություն Հորդանանի արքայադուստր Դինա Մայրեդը Հայաստան է ժամանել Մխիթար Հերացու անվան Երևանի պետական բժշկական համալսարանի հրավերով։ Նրա ղեկավարած միությունն ունի շուրջ 1000 անդամ-կազմակերպություն աշխարհի 150 երկրից։ Արքայադուստր Դինա Մայրեդի այցը կնպաստի, որ Հայաստանի ուռուցքաբանական կազմակերպությունները ներգրավվեն աշխարհի քաղցկեղի խոշորագույն միությանը։ Այս մասին հայտնեց ԵՊԲՀ ռեկտոր Արմեն Մուրադյանը։
«Համագործակցությունը շատ լայն շրջանակ պետք է ունենա։ Բժշկական համալսարանն այդ միությանը միանալու նախաձեռնողականություն է դրսևորել, ինչն էլ քաղցկեղի դեմ պայքարի միջազգային փորձը փոխանակելու հնարավորություն է տալու ` սկսած պրոֆիլակտիկայից մինչև ամենավերջին տեխնոլոգիաների ներդրում»,-ասաց ԵՊԲՀ ռեկտորը։
Այցի շրջանակում Երևանի պետական բժշկական համալսարանն ու Արյունաբանւոթյան և ուռուցքաբանության Հայկական Ասոցիացիան ապրիլի 28-ին կազմակերպելու են քաղցկեղը վերապրածների կոնգրես, որի ընթացքում ելույթ կունենան քաղցկեղը հաղթահարած մարդիկ, ինչպես նաև ոլորտի մասնագետներ։
![Принцесса Иордании Майред посетила детей, страдающих онкологическими заболеваниями Принцесса Иордании Майред посетила детей, страдающих онкологическими заболеваниями - Sputnik Արմենիա](https://cdn.am.sputniknews.ru/img/714/78/7147834_0:0:1920:1080_600x0_80_0_0_4ae6403fb467f4b4fba67a15b6fa4bf8.jpg)