Ֆինանսների նախարարը Վաշինգտոնում հանդիպումներ է ունեցել ֆինանսական աշխարհի խոշոր խաղացողների հետ և քննարկել դեպի Հայաստան ֆինանսական հոսքերի ակտիվացման հնարավորությունները: Միջազգային վարկանիշային կազմակերպությունները Հայաստանին վերաբերվում են որպես լուրջ գործընկերոջ և պատրաստ են համագործակցել ներդրումային հեռանկարային ծրագրերով:
Օտարերկրյա պետությունների և միջազգային կազմակերպությունների հետ համագործակցության բաժնի պետ Լարիսա Հարությունյանի խոսքով' Վաշինգտոնում նախարարի հանդիպումների օրակարգը բավականին հագեցած է եղել` երեք օրվա ընթացքում ավելի քան 20 հանդիպում։ Համաշխարհային բանկի և Արժույթի միջազգային հիմնադրամի բարձրաստիճան պաշտոնյաների հետ քննարկվել են ընթացիկ օրակարգի հարցերը և լուրջ նախադրյալներ են ստեղծվել հետագա համագործակցության համար։
«Բոլոր հանդիպումների արդյունքները դրական կարելի է գնահատել, և հանդիպումների արդյունքում էական առաջընթաց կարող է արձանագրվել»,- նշեց Հարությունյանն` ընդգծելով, որ բոլոր հանդիպումները կարևոր էին, որովհետև առաջընթացի ուղղությամբ արված քայլերն իրենց էական ազդեցությունն են ունենալու Հայաստանի տնտեսության և ֆինանսավարկային հարաբերություններերի վրա։
