ԵՐԵՎԱՆ, 26 ապրիլի — Sputnik. ՀՀ արտակարգ իրավիճակների նախարար Դավիթ Տոնոյանն ընդունել է Ռուսաստանի Դաշնության «ԱՆՏԻԳՐԱԴ» գիտաարտադրական կենտրոնի ներկայացուցիչներին: ՀՀ ԱԻ նախարարության պատվերով կենտրոնն իրականացրել է երկրի կարկտավտանգ տարածքների ուսումնասիրություն, որի հիման վրա էլ ներկայացվել են հակակարկտային համակարգի արդիականացման մեխանիզմն ու հնարավորությունները:
Հանդիպման նպատակն էր՝ քննարկել Հայաստանի տարածքում ավտոմատ հրթիռային տեխնոլոգիաների կիրառումը կարկտահարությունից գյուղատնտեսական կուլտուրաների վնասը մեղմելու համար, տեղեկացնում է ԱԻՆ-ը:
Ըստ նախնական հաշվարկների՝ միջինում բերքի 5-6 % վնասվում է կարկտաբեր ամպերից: Հակակարկտային հրթիռային տեխնոլոգիաները հավաքագրված են առաջատար և ժամանակակից սարքավորումներով, որոնք թույլ են տալիս 80-90 % կրճատել կարկտից բերքի վնասի չափերը:
Այդ գործընթացում առաջնային նշանակություն ունեն նաև արդիականացված ռադիոլոկացիոն կայանները, որոնք հնարավորություն են տալիս ճշգրիտ օգտագործել հակակարկտային կայաններն ու ավիացիայի միջոցները:
Առաջարկվող համակարգը առավել մատչելի է և արդյունավետ, կարող է ծառայել 15-20 տարի:
