ԵՐԵՎԱՆ, 26 ապրիլի — Sputnik, Արմենուհի Մխոյան. Ապրիլի 30-ից մայիսի 3-ը Գյումրիում կանցկացվի HAY-AT JAZZ խորագիրը կրող նախագիծը՝ նվիրված ջազի միջազգային օրվան: Էլ ի՞նչ Գյումրի, որ չտարբերվի մյուս քաղաքներից. եթե մյուս տեղերում ջազի միջազգային տոնը մեկօրյա է, ապա Գյումրիում ջազի սիրահարներն իրենց սիրած մեղեդիները կարող են ունկնդրել 4 օր անընդմեջ:
Նախաձեռնությունը Գյումրիում, ինչպես միշտ, այս անգամ ևս կյանքի կկոչվի «Մանուկյան ընկերության» և «Ջազի հայկական ասոցիացիայի» գործակցության արդյունքում՝ Գյումրու քաղաքապետարանի աջակցությամբ:
Գյումրեցիները բակին «հայաթ» են ասում: Հայաթներում կազմակերպված ցանկացած հավաք մտերմության, հարազատության ու ջերմության խորհուրդ ունի: Հենց դա հաշվի առնելով է, որ ջազը կներկայացվի Գյումրու հայտնի թանգարանների բակերում, սակայն «հայաթ» բարի թուրքերեն իմաստը բացառելու համար նախաձեռնողները հայաթին փորձել են նոր շունչ տալով կոչել HAY-AT JAZZ՝ «Հայը ՝ ջազում»:
Այս օրերի ընթացքում ջազի սիրահարները միայն իսկական ու մաքուր ջազ են լսելու Գյումրու հայտնի թանգարանների բակերում. Լևոն Մալխասյան ջազ տրիո, Չիկոս նյու տրիո և Աննա Կոստանյան, Արմեն Հյուսնունց քառյակ, Լուսինե Սարգսյան և Ռաֆայել Պետրոսյան բենդ: Նախաձեռնողները վստահեցնում եմ՝ և՛ ջազ լսելու հնարավորություն կա, և՛ թանգարան այցելելու: Ի դեպ, բոլոր ջազային համերգների մուտքն ազատ է լինելու:
