ԵՐԵՎԱՆ, 25 ապրիլի — Sputnik. Ռիգայի հայ համայնքի ներկայացուցիչները հարգանքի տուրք մատուցեցին Օսմանյան կայսրությունում իրագործված ցեղասպանության զոհերի հիշատակին։ Այս մասին հայտնում է Sputnik Լատվիան։
Վաղ առավոտից մարդիկ գալիս էին Ռիգայի հայկական եկեղեցի, մոմեր վառում ու աղոթում։
Ռիգայի հայ համայնքի ներկայացուցիչները հավաքել էին մի խաչքարի մոտ, որը Լատվիայի մայրաքաղաքում է տեղադրվել Հայոց ցեղասպանությունից 75 տարի անց։
Խաչքարի մոտ ելույթ ունեցավ «Արարատ» թերթի գլխավոր խմբագիր և հրատարակիչ Ալեքսանդր Գերոյանը։
«Ապրիլի 24-ը ողբերգական օր է, բայց այն միավորում է մեր ժողովրդին։ Անցած ժամանակահատվածում մենք շատ կարևոր գործ ենք արել։ Գործարար ու բարերար Մխիթար Մխիթարյանի շնորհիվ Ռիգայի գետտոյի և Հոլոքոստի թանգարանում բացվել է մշտական ցուցադրություն` նվիրված Օսմանյան կայսրությունում իրագործված ցեղասպանությանը», — ասաց նա։
Ռիգայի գետտոյի և Հոլոքոստի թանգարանում շարունակում է գործել Հայոց ցեղասպանության 100-րդ տարելիցին նվիրված ցուցադրությունը, որը բացվել է 2015 թվականին։ Ցուցադրության հիմնական ուղերձն այն է, որ եթե միջազգային հանրությունը դատապարտեր 1915 թվականի Հայոց ցեղասպանության հետ կապված գործողությունները, ապա Երկրորդ համաշխարհային պատերազմի ժամանակ տեղի չէր ունենա հրեաների Հոլոքոստը։
