ԵՐԵՎԱՆ, 25 ապրիլի — Sputnik. Հայերը միշտ էլ մեծ ներդրում են ունեցել Լեհաստանի քաղաքական, հասարակական, մշակութային ոլորտների զարգացման մեջ դեռ լեհ-լիտվական պետության ժամանակներից (Ռեչ Պոսպոլիտա —խմբ.)»։ Այս մասին «Լվովում հայկական տաճարի վերածնունդ» ցուցահանդեսի ժամանակ ասաց Հայաստանում Լեհաստանի արտակարգ և լիազոր դեսպան Եժի Մարեկ Նովակովսկին։
Նա նշեց, որ Լեհաստանում բնակվող հայերին երբեք չեն հետապնդել իրենց ազգության կամ հավատքի համար։
«Երեկ մենք հարգանքի տուրք մատուցեցինք Հայոց ցեղասպանության զոհերին։ Ես իսկապես կիսում եմ հայերի ցավը։ Սակայն մենք այսօր ցուցահանդես ենք բացում, որը նվիրված է մեր պատմության ավելի լուսավոր էջին», — նշեց դեսպանը։
Ազգային պատկերասրահի տնօրեն Արման Ծատուրյանը նշեց, որ լեհերը միշտ հատուկ վերաբերմունք են ցուցաբերել հայերի ու հայ համայնքի նկատմամբ։
«Հայերը հարգում են կրոնն ու եկեղեցին։ Եթե աշխարհի որևէ կետում կա 10-15 հայ, նրանք անպայման մատուռ կամ եկեղեցի են կառուցում։ Իսկ XIV դարում փայտի եկեղեցին փլուզել են և կառուցել են այս հիանալի տաճարը, որը գտնվում է ՅՈՒՆԵՍԿՕ-ի հովանու ներքո», — ասաց Ծատուրյանը։
Ցուցահանդեսի բացման ժամանակ տեր Ասողիկ քահանա Կարապետյանն իր հերթին կարևորեց այն փաստը, որ Հայկական տաճարը պատկանում է հայերին։
«Այսօր գործող տաճարը պատկանում է Ուկրաինայի հայկական թեմին։ Որոշ հարևան երկրներում հայերի մշակութային ու պատմական հուշարձանները ոչնչացնում են` փորձելով ջնջել հայկական հետքը։ Իսկ Եվրոպայում պատմամշակութային արժեքները ոչ միայն պահպանվում են, այլև` վերականգմվում», — ասաց քահանան։
Նա հավելեց, որ այդպիսի քաղաքակիրթ պահվածքն օրինակ է ծառայում մյուս երկրների համար։
Ցուցահանդեսը բաց է մինչև մայիսի 27-ը։
