ԵՐԵՎԱՆ, 25 ապրիլի — Sputnik. ՌԴ Տամբով քաղաքի քրեակատարողական հիմնարկում պահվող, 6 տարի 9 ամիս ժամկետով ազատազրկման դատապարտված ՀՀ քաղաքացի Հրաչյա Հարությունյանը, որի մասնակցությամբ տեղի ունեցած ավտովթարի հետևանքով 18 մարդ էր մահացել, կփոխանցվի Հայաստան, Sputnik Արմենիային այս տեղեկությունը հաստատեց ՀՀ արդարադատության նախարարի տեղակալ Վիգեն Քոչարյանը:
«ՀՀ իշխանությունները, Արդարադատության նախարարությունը հետևողական ջանքեր են գործադրել դատապարտյալի փոխանցման խնդրի լուծման ուղղությամբ և ներկայում Հրաչյա Հարությունյանի՝ Հայաստան փոխանցելու հարցում ֆինանսական պարտավորությունների առկայության խոչընդոտը վերացված է», — ասաց Քոչարյանը:
Նրա խոսքով` Մոսկվայի Տրոիցկի շրջանային դատարանի` 2014 թվականի օգոստոսին կայացրած դատավճռով ճանաչվել էր քաղաքացիական հայցվորների հայցային պահանջներ ներկայացնելու իրավունքը: Ըստ փոխնախարարի` Հարությունյանի դեմ ներկայացված ֆինանսական փոխհատուցման պահանջը չկատարելը արգելք էր հանդիսանում դատապարտյալի փոխանցման համար:
Քոչարյանը նշեց, որ Հրաչյա Հարությունյանի տեղափոխման ժամկետների մասին դեռ վաղ է խոսել։
Հրաչյա Հարությունյանն իր «Կամազ» մակնիշի մեքենայով 2013-ի հուլիսի 13-ին ՌԴ Պոդոլսկի շրջանի մերձակայքում բախվել էր մարդատար ավտոբուսի, ինչի հետևանքով զոհվել էր 18 մարդ։ Նա դատապարտվել էր 6 տարի և 9 ամիս ազատազրկման:
Դատավճռի համաձայն` Հրաչյա Հարությունյանը մեղավոր է ճանաչվել երկու հոդվածով` ճանապարհային երթևեկության և տրանսպորտային միջոցների շահագործման կանոնների խախտում, որն առաջացրել է ծանր հետևանքներ, և կեղծ փաստաթղթի օգտագործում:
