ԵՐԵՎԱՆ, 24 ապրիլի — Sputnik. Հայոց ցեղասպանության ճանաչումն ընթացքի մեջ է, և այսօր արդեն նոր փուլի, նոր հարցադրումների ժամանակն է, ցեղասպանության հուշահամալիրում Sputnik Արմենիայի հետ զրույցի ժամանակ ասաց կոմպոզիտոր, ՀՀ արվեստի վաստակավոր գործիչ, Հայաստանի ժողովրդական արտիստ Տիգրան Մանսուրյանը՝ համոզմունք հայտնելով, որ մի օր Արարատ լեռը սահմանից այս կողմ է լինելու:
Իսկ դրա համար, ըստ Մանսուրյանի, մենք պետք է իրար սիրենք, քիչ փնովենք և ամեն մեկս մեր գործը լավ անենք:
«Ուրիշ ճանապարհ չունենք, մարդու անելիքը դա է, մայրը մայրություն անի, ուսուցիչը՝ ուսուցչություն, զինվորը՝ զինվորություն, ես էլ, երբեմն, երաժշտություն կգրեմ»,- ասաց Մանսուրյանը՝ հավելելով, որ սա է դեպի կայացած երկիր տանող միակ անսխալ ճանապարհը:
