ԵՐԵՎԱՆ, 23 ապրիլի — Sputnik. Ուժային ակրոբատ Վարդանյան եղբայրները առաջին տեղն են զբաղեցրել ռուսական Առաջին ալիքի «Минута славы» հոբելյանական նախագծի եզրափակիչում և նախագծում հաղթելու բոլոր հնարավորություններն ունեն։
Եզրափակիչի արդյունքներով՝ ամենաբարձր գնահատականը՝ 40 միավոր, հավաքել են միայն Վարդանյան եղբայրները Մոսկվայից։
Գևորգ ր Անդրանիկ եղբայրների ելույթը «Минута славы» նախագծում ոչ ոքի անտարբեր չի թողնում։ Ամեն անգամ նրանք ավելի են բարդացնում և շտկում իրենց համարները։ Ժյուրին խոստովանում է, որ եղբայրները այդ ժանր են բերել թարմություն և անկրկնելի մի ոճ։
«Դա ուղղակի դյուցազնական համար էր։ Նրանք հնարքների մի ամբողջ հավաքածու ցուցադրեցին․․․ Դա այս ժանրում իմ տեսածներից լավագույնն է, իսկ ես շատ բան եմ տեսել»,- ասաց ժյուրիի անդամ, թատրոնի և կինոյի հայտնի դերասան Սերգեյ Յուրսին։
Եղբայրները խոստովանում են, որ ելույթի ընթացքում աննկարագրելի զգացողություններ ունեցան։
«Մենք կյանքը առանց միմյանց չենք պատկերացնում։ Մենք երդվել ենք, որ միշտ միասին ենք լինելու՝ ինչ էլ որ պատահի։ Երկուսով մենք ուժեղ ենք»,- ասացին եղբայրներն Առաջին ալիքի հետ հարցազրույցում։
Գևորգ և Անդրանիկ Վարդանյանները ծնվել են Երևանում։ Նրանք կրկես են եկել դեռ մանուկ հասակից, սկզբում լարախաղ էին սովորում, հետո դարձան ուժային ակրոբատներ։
«ՅՈՒԴԻ» պարային խումբը Տոմսկից եզրափակչում երկրորդ տեղը զբաղեցրեց, իսկ լավագույների եռյակը եզրափակեց հայ-վրացական դուետը Ալեքսեյ Գիգաուրիի ու Ռոման Խալաֆյանի մասնակցությամբ։
«Минута славы» նախագծում աճպարարները սկզբում առանձին էին ելույթ ունենում, բայց հետո դուետ կազմեցին։
«Լյոշան ոչ թե ուղղակի ընկերս է, նա իմ եղբայրն է։ Մեր ուղեղները տարբեր ուղղություններով են աշխատում՝ նրա ուղեղը աշխատում է գաղափարի ուղղությամբ, իմը՝ գաղափարի իրականացման»,- խոստովանեց Ռոմանը։
Ալեքսեյի խոսքով՝ նրանց համար շատ հաճելի է երկուսով ելույթ ունենալ։
Ինչպես եթերում հայտնեց հաղորդավար Միխայիլ Բոյարսկին, «Минута славы» նախագծի հաղթողը կորոշվի մեկ շաբաթից՝ սուպերեզրափակչի ընթացքում։
Ժյուրիի առջև ելույթ կունենան ութ լավագույն մասնակիցները։ Առաջին տեղի համար մրցանակը կկազմի 5 միլիոր ռուբլի, երկրորդ տեղի համար՝ 3 միլիոն ռուբլի, իսկ երրորդի՝ մեկ միլիոն ռուբլի։
