ԵՐԵՎԱՆ, 21 ապրիլի — Sputnik. ՊՊԾ գնդի գրավմանը հաջորդած իրադարձությունների օրերին լրագրողների նկատմամբ բռնությունները կրել են թիրախավորված բնույթ: Այս մասին այսօր լրագրողների հետ հանդիպմանն ասաց ՀՀ Մարդու իրավունքների պաշտպան Արման Թաթոյանը:
Լրագրողների նկատմամբ ոստիկանների կիրառած բռնությունները ՄԻՊ-ի գրասենյակում արձանագրվել են գնդի գրավմանը հաջորդած առաջին օրերից՝ հուլիսի 19-ից սկսած:
ՊՊԾ գնդի գրավման օրերին տեղի ունեցած իրադարձություներին վերաբերող ՄԻՊ զեկույցում լրագրողների նկատմամբ կիրառված բռնության դեպքերը խիստ գնահատականի արժանացելուց զատ Արման Թաթոյանը նաև պահանջում է պարզել ու պատժել լրագրողների նկատմամբ գործողություններ կատարելու հրաման արձակած անձանց:
«Զեկույցում նաև վերլուծված է, որ լրագրողների նկատմամբ բռնություններն ունեցել են նրանց պատժելու նպատակ: Հակառակ դեպքում ինչպե՞ս բացատրել այն, որ լրագրողնի նկատմամբ հետապնդումը շարունակվել է նաև այն դեպքում, եբ լրագրողը դադարեցրել էր իր աշխատանքը: Բացի այդ, մի դեպքում էլ լրագրողները բռնություններից պաշտպանվելու համար պատսպարվել են մոտակա հացի փռում: Սակայն քաղաքացիական հագուստով մարդիկ կոտրել են դուռը, մտել ներս ու ներսում բռնություն կիրառել լրագրողների նկատմամբ: Նման վերաբերմունքը կարող է պայմանավորված լինել միայն անձին պատժելու, նրան նվաստացնելու, արժանապատվությունը վիրավորելու ցանկությամբ»,- ասաց Թաթոյանը:
ՄԻՊ զեկույցում հիշատակվում է նաև դեպք, երբ հուլիսի 24-ին բերման ենթարկված լրագրողը հարուցված քրեական գործում ներգրավվել է որպես վկա, ինչը Արմեն Թաթոյանի մեկնաբանմամբ, նույնպես անթույլատրելի է, քանի որ լրագրողը չի կարող վկա լինել իր լուսաբանած իրադարձություններին վերաբերող գործով:
«Լրագրողը հանրային վայրում ոստիկանի կատարած գործողությունները լուսանկարահանելու, տեսանկարահանելու լիարժեք իրավունք ունի, որովհետև լրագրողը կատարում է հանրային աշխատանք և ունի հսկող դերակատարություն, ինչպես նշում է Եվրոպական դատարանի տերմինաբանությունը՚,- ասաց Արման Թաթոյանը ևս մեկ անգամ շեշտելով, որ իր աշխատանքը կատարող լրագրողնի բերման ենթարկելու իրավունք ոստիկանությունը չունի:
Արմեն Թաթոյանը խոստացավ այսուհետև նույնպես լինել լրագրողների կողքին ու պաշտպանել նրանց մասնագիտական իրավունքները:
Նշենք, որ ըստ ՄԻՊ զեկույցում նշված փաստերի` հուլիսի 17-31-ը ՄԻՊ գրասենյակը բազմաթիվ հաղորդումներ է ստացել՝ տեղական և արտասահմանյան ավելի քան 1 տասնյակ լրատվամիջոցների լրագրողների և օպերատորների իրավունքների կոպիտ խախտումների մասին:
