ԵՐԵՎԱՆ, 21 ապրիլի — Sputnik. Հայաստանի պաշտպանության նախարար Վիգեն Սարգսյանը, մեկնաբանելով Հայաստանի և Ադրբեջանի միջև սպառազինության հավասարակշռության հետ կապված իրավիճակը, հիշեց չինացի ռազմական տեսաբան Սուն Ցզիին։
«Կարդացեք Սուն Ցզի, որն ասում էր`երբ քիչ է, ցույց տուր, թե շատ է, և հակառակը` երբ շատ է, ցույց տուր, որ քիչ է։ Եթե մենք նույնիսկ հավասարակշռել ենք և անցել հակառակորդին որևէ բանում, մեզ ձեռնտու չէ ցույց տալ, որ մենք նման միջոցներ ունենք»։
Նա նշեց, որ Ադրբեջանի կողմից զենքի վերջին ձեռքբերումներից հետո տարածաշրջանում խախտվել է սպառազինության հավասարակշռությունը։
«Սակայն պաշտպանունակության բալանսը պահպանվում է, դրա տակ շատ չբացահայտված բան կա», — ասաց Սարգսյանը։
Նրա խոսքով` պաշտպանության նախարարությունը ժամանակ առ ժամանակ հասարակությանն է ներկայացնում որոշակի ռազմական ձեռքբերումներ, սակայն դա չի նշանակում, թե պետք է հայտարարագիր ներկայացնել յուրաքանչյուր գնման վերաբերյալ։
