ԵՐԵՎԱՆ, ապրիլի 21 — Sputnik. «Մոսգորտրանս» ընկերությունը գործարկել է Մոսկվա-Երևան ավտոբուսային պաշտոնական երթուղին։ Այս մասին հայտնում է կազմակերպության մամուլի ծառայությունը։
Ավտոբուսները երթեր են իրականացնելու շաբաթը երեք անգամ` չորեքշաբթի, ուրբաթ և շաբաթ օրերին։
«Երթուղու նպատակն է ապահովել արագ ու առավելագույնս ապահով ուղևորություններ։ Ավտոբուսները մեկնում են «Յուժնիե վորոտա» միջազգային ավտոկայանից, որը զինված է հսկիչ գոտիներով, մետաղորսիչներով և տեսահսկման համակարգով», — ասել է «Մոսգորտրանս» պետական կազմակերպության Ավտոկայանների շահագործման և զարգացման ծառայության տնօրեն Եվգենի Ժուկովը։
Ընկերությունը հատուկ ուշադրություն է դարձնելու ավտոբուսների տեխնիկական վիճակին ու վարորդների բուժզննմանը։
2016 թվականի հոկտեմբերի 14-ին Հյուսիսային Օսեթիայում` Բեսլան քաղաքից 6 կմ հեռավորության վրա, Մոսկվա-Երևան ոչ կանոնավոր ուղևորափոխադրում իրականացնող ավտոբուսը վթարի էր ենթարկվել, որի հետևանքով մահացել էր 5 մարդ, 27-ը` հոսպիտալացվել, նրանցից չորսը երեխաներ էին։ Ավելի ուշ հայտնի դարձավ, որ փոխադրող կազմակերպությունն օրինական դաշտում չէր գործում։ Այդ ժամանակ Մոսկվայի իշխանության ներկայացուցիչները հայտարարեցին, որ Մոսկվա-Երևան-Մոսկվա պաշտոնական երթուղիներ կկազմակերպեն։
Ավելի վաղ` 2015 թվականի նոյեմբերի սկզբին, Տուլայի շրջանում Մ-4 մայրուղու վրա վթարի էր ենթարկվել Մոսկվայից Երևան եկող ավտոբուսը, որում ավելի քան 60 մարդ կար, բոլորը` Հայաստանի քաղաքացիներ։ Վթարի հետևանքով մահացել էր 9 մարդ, տուժել` 46-ը։
