ԵՐԵՎԱՆ, 21 ապրիլի — Sputnik. ՀԱՊԿ-ի նոր գլխավոր քարտուղար Յուրի Խաչատուրովի քաղաքացիությունը երկակի դեր է խաղալու կազմակերպության դիրքորոշումը հայտնելու ժամանակ, ասաց ՀՀ պաշտպանության նախարար Վիգեն Սարգսյանը։
Նա նշեց, որ Հայաստանը կշարունակի ՀԱՊԿ-ի ամրապնդման աշխատանքները, քանի որ կազմակերպությունը մի շարք հարցեր է լուծում, այդ թվում՝ ռազմական կրթության, օպերատիվ արձագանքի, խաղաղության պահպանման, հակաահաբեկչական պայքարի վերաբերյալ և այլն։
«Մենք այդ ներուժն ունենք և անելու ենք ամեն ինչ, որպեսզի մեր անդամակցությունը ՀԱՊԿ-ում առավելագույնս օգտակար լինի»,- ասաց Սարգսյանը։
ՀԱՊԿ բարձրագույն ադմինիստրատիվ պաշտոնին Հայաստանի ներկայացուցչի նշանակման մասին միաձայն որոշում ընդունվեց ապրիլի 14-ին՝ Բիշքեկում կայացած ՀԱՊԿ անդամ-պետությունների ղեկավարների ոչ պաշտոնական հանդիպման ժամանակ։ Յուրի Խաչատուրովը պարտականությունների կատարմանը կանցնի ընթացիկ տարվա մայիսի 2-ին։
