ԵՐԵՎԱՆ, 20 ապրիլի — Sputnik. Ռուսաստանի լրագրողների միության քարտուղար Աշոտ Ջազոյանին երեք տարի ժամկետով արգելել են մուտք գործել Ուկրաինա։ Այդ մասին հայտնում է Ուկրաինայի անկախ մեդիա-արհմիությունը` հղում անելով Ուկրաինայի անվտանգության ծառայությանը։
Աշոտ Ջազոյանը լրագրող է, վավերագրական կինոյի ռեժիսոր և սցենարիստ, «Լրագրողների ընկերության» մեդիակոնգրեսի նախագահ, 2008 թվականից` Ռուսաստանի լրագրողների միության քարտուղար։
Արգելքի պատճառ է հանդիսացել Ջազոյանի այցը Ղրիմ։ Ուկրաինայի իշխանությունները համարել են, որ լրագրողը «հաճախ է խախտում ուկրաինական օրենսդրությունը Ղրիմ այցելելու ժամանակ՝ Ուկրաինայի սահմանը հատելու առումով»։
Ուկրաինայի անվտանգության ծառայության համապատասխան որոշումն ընդունվել է 2017 թվականի հունվարի 18-ին։
«Ռուսաստանի լրագրողների միության քարտուղար Աշոտ Ջազոյանը հասարակության համար վտանգավոր արարք է կատարել, որը հակասում է Ուկրաինայի անվտանգության ապահովմանը, ինչի կապակցությամբ որոշում է կայացվում արգելել նրա մուտքը Ուկրաինա երեք տարի ժամկետով»,- գրված է Ուկրաինայի անվտանգության ծառայության որոշման մեջ, որի կրկնօրինակը հրապարակված է Ուկրաինայի անկախ մեդիա-արհմիության կայքում։
Ռուսաստանի քաղաքական և մշակութային գործիչների մուտքն արգելելու մասին որոշումներ հաճախ են ընդունվում Ուկրաինայում՝ «ազգային անվտանգության ապահովման» նպատակներից ելնելով։
Վերջին աղմկահարույց դեպքերից մեկը երգչուհի Յուլիա Սամոյլովայի մուտքն Ուկրաինա արգելելն էր։ Յուլիա Սամոյլովան պետք է Ռուսաստանը ներկայացներ «Եվրատեսիլ» երգի միջազգային մրցույթում։ Ուկրաինայի անվտանգության ծառայությունը երեք տարով արգելել է նրան երկիր մուտք գործել Ղրիմում, որը Կիևը մինչ օրս իր տարածքն է համարում, ելույթ ունենալուց հետո։ Եվրոպական հեռարձակողների միության ղեկավար Ինգրիդ Դելտենրեն հայտարարել էր, որ խորապես ցավում է նրա համար, որ «Եվրատեսիլն» օգտագործում են քաղաքական խաղերի համար։
«Մրցույթը պետք է ուրախացնի և միավորի միլիոնավոր մարդկանց, այն նրանց միմյանց դեմ տրամադրելու համար չէ»,- հայտարարել է Դելտենրեն։ Մրցույթի ողջ պատմության ընթացքում չի եղել դեպք, երբ որևէ երկրի արգելեն մասնակցել։
