ԵՐԵՎԱՆ, 20 ապրիլի — Sputnik. ՀՀ ընդերքի օրենսգրքով սահմանված մոնիթորինգը, իրականացման չափորոշիչները և հաշվետվությունների ներկայացման ընթացակարգերը կանոնակարգված չեն։ Այսօր` ապրիլի 20-ին, ՀՀ կառավարության նիստի ժամանակ ասաց վարչապետ Կարեն Կարապետյանը։
Ըստ նրա` դրա արդյունքում հնարավորություն չի լինում հստակ գնահատել, թե ընդերքի շահագործման հետևանքով շրջակա միջավայրի վրա ինչ ազդեցություն կա, և դա ինչ ռիսկեր է պարունակում։
«Բնապահպանության նախարարին հանձնարարում եմ 3 ամսվա ընթացքում ուսումնասիրել միջազգային փորձը և կառավարության աշխատակազմ ներկայացնել իրավական ակտերի փաթեթ կանոնակարգելու համար ընդերքօգտագործողների կողմից շրջակա միջավայրի վրա ազդեցության մոնիթորինգը»,- ասաց վարչապետը։
Իսկ էներգետիկ ենթակառուցվածքների և բնական պաշարների նախարար Աշոտ Մանուկյանին վարչապետը հանձնարարեց հետևել ընդերքօգտագործողների ներդրումային պարտավորությունները։ Ովքեր դրանք չեն ներկայացնի ճիշտ ժամկետում և ճիշտ չափով, կզրկվեն լիցենզիաներից։
