ԵՐԵՎԱՆ, 19 ապրիլի — Sputnik. «Կոմսոմոլսկայա պրավդա» թերթը պատմում է 48-ամյա հայ տղամարդու մասին, որը մենակ է դաստիարակում երեք զավակներին։
Գուրգենի (հերոսի անունը փոխված է) ընտանիքը դատախազության ուշադրության կենտրոնում է հայտնվել «Միասին երեխաների համար» համաժողովի ժամանակ։ Թերթի թղթակիցը դատախազության, սոցիալական պաշտպանության, ոստիկանության աշխատակիցների հետ եղել է Գուրգենի վարձակալած տանը։
«48-ամյա տղամարը Լիպեցկ է տեղափոխվել ավելի քան 15 տարի առաջ` հորական տունը թողնելով եղբայրներին։ Այստեղ ամուսնացել է մի աղջկա հետ, երեք երեխա են ունեցել։ Սակայն նրանց չի հաջողվել երջանիկ ընտանիք կազմել։ Տղամարդն ասում է, որ կինը սիրել է թրև գալ, այդ պատճառով վռնդել է կնոջը և պաշտոնապես ամուսնալուծվել։ Իսկ երեխաները, դատարանի որոշմամբ, նրա խնամակալության են հանձնվել», — նշում է պարբերականը։
Իրավիճակը բարդացնում է այն փաստը, որ Հայաստանի քաղաքացին Ռուսաստանում օրինական ապրելու իրավունք չունի, քաղաքացիություն չի ձևակերպել և Ռուսաստանի տարածում գտնվելու իրավունքը չի երկարացրել։
«Գուրգենը բացատրում է, որ այս իրավիճակում է հայտնվել իրար հաջորդող անախորժությունների և միգրացիոն ծառայության աշխատակիցների խարդավանքների պատճառով, որոնք ոչ մի կերպ չեն ուզում ձևակերպել նրա քաղաքացիությունը։ Բայց դատախազություն ուղարկված բողոքների պաշտոնական պատասխանները ցույց են տալիս, որ Գուրգենը նրանց չի էլ դիմել։ Հավանական է, որ տղամարդուն խանգարում են լեզուն լավ չիմանալն ու իրավական առումով ոչ գրագետ լինելը», — գրում է ռուսական պարբերականը։
Գուրգենը պատրաստվում է դիմել Ռուսաստանի նախագահ Պուտինին։
Նա Ռուսաստանում օրինական աշխատանք կատարելու իրավունք չունի և գումար է վաստակում սեզոնային աշխատանքով։
«Վերջերս էլ անձնագիրն է կորցրել… Չի բացառվում, որ տղամարդուն և նրա` հոգեկան խնդիրներ ունեցող մորը, որը նույնպես ուշացրել է քաղաքացիության հաստատումը, ցանկացած պահի վտարեն երկրից։ Այդ դեպքում Գուրգենի երեք երեխաները, որոնց կերակրողն ու դաստիարակողը հայրն է, կորբանան», — գրում է պարբերականը։
Թերթը գրում է նաև, որ երեխաները «Ռուսաստանի լիարժեք քաղաքացիներ են, առողջ են, խելացի, դպրոցում լավ են սովորում։ Թեև նրանց վարձակալած տունը շատ վատն է, այդուհանդերձ երեխաները նորմալ հագնված են, կուշտ, տարբեր խմբակներ են հաճախում»։
